 |
| 相片連結 |
今日喺FB見到有松松出事, 因為氣溫驟降, 唔知係咪家長未安排好為狗狗保暖禦寒, 放工番到屋企見到狗狗全身凍晒又僵硬, 幸好仍在清醒狀態; 當然望到佢神情呆滯手足冰冷, 就知道有麻煩, 即刻去睇急症啦!
去到醫院接近休克喇, 初時估計可能係氣管全蹋下, 安排照X-ray啦, 後來斷定係低溫影響, 同佢保暖後穩定番!
都咪話唔驚, 低溫係好危險㗎, 好彩媽媽放工即返屋企, 如果碰啱有約就慘, 後果可能非常嚴重啦; 今次可謂有驚無險, 亦可能狗狗只得兩歲, 仍屬少年, 頂得吓!
真係唔好話我係緊張媽媽, 事實要照顧呢類小型狗狗都頗難, 我呢3隻豬仔, 身形丁咁大, 只可以抱於手中呵護, 唔好話相比起工作犬, 體能同一般狗狗都無得比較; 一個唔小心, 真係好容易要講拜拜!
生命係好脆弱㗎, 今時今日大家養嘅毛孩, 已經嬌縱慣; 同以往天生天養嘅看門狗係唔同啦, 幾曾見過佢哋要承受風吹雨打, 食菜汁冷飯?
我信體能係需要鍛錬, 但都要分個別犬種, 松松係玩賞犬, 就有D唔同喇; 今次係第二次我聽到因為天氣凍, 而引起低溫, 上次係朋友S嘅松松, 差D無命啦!
所以上次波波高燒後又嚟體溫下跌, 真係嚇傻我㗎!
唔好認為狗狗生命頑強, 唔好同以前養嘅狗狗做比較, 環境時代有唔同, 就一切都唔同晒!
各位養小型狗狗嘅父母要特別小心, 今日都唔算好凍都有狗狗出事, 你未聽聞過唔代表係無㗎!
雖然我開足暖爐, 但為保險計都係同3隻豬仔著番件衫, 以策安全喇; 我知要波波著衫係好慘, 但佢算係啱啱好番, 我唔想再冷親又出事呀; 我唯有比佢自己揀, 同佢一直咁換衫, 直至試到呢件披風, 佢肯起身行!
可能呢件無阻礙佢手脚郁動, 佢較易習慣; 比佢著耐D會好少少嘅, 往年佢都有著衫, 係就係唔開心, 但都無法 :(
波波喺4歲前我從未比佢著過衫, 我一直認為佢哋天生嘅皮草最靚, 著咩衫都比唔上㗎; 我以前養嘅5寶, 都係年老抵抗力差先開始著衫, 但唔知係咪呢幾隻豬仔較孱, 可能同身型太細都有關, 佢哋係好怕凍㗎!
著唔著衫都無得由我揀, 佢哋頂唔住就要著衫啦, 唔通要靚唔要命, 由得佢哋裸跑, 冷病只係我自找麻煩!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
