 |
| 好彩精神唔太差 |
半夜聽到達達發出D怪聲, 即時跳落床就剛好睇見好心痛嘅一幕, 見佢前手抓咗幾吓, 跟住就向側跌低, 手腳僵硬曬; 我真係好驚, 個腦立刻浮現咗叻叻病發嘅情況出嚟, 達達好似跟隨住叻叻嘅舊路, 8歳開始健康衰退; 自從見到達達有禿毛症, 已經開始驚, 好驚同叻叻一樣!
老天好殘忍啊, 要我再一次面對寶貝有呢種病, 真係好傷, 夭心夭肺!
抱起全身僵硬嘅達達, 強扮鎮定叫佢唔使驚, 一邊同佢按摩微笑住同佢講, 無事㗎!
幾秒後達達就放鬆番, 我試放低佢睇睇佢可否企得番, 還好佢可以企到仲識行!
 |
| 都肯行吓! |
諗起之前有訂咗順勢藥"fast relief", 係針對應用於突發緊急情況, 好彩無驚到心神亂晒忘記咗, 唔理咁多即刻餵佢先喇; 然後放佢上我床, 瞓喺我身邊, 方便留意佢情況!
我覺得達達總係唔自然, 同平常係有分別, 呢個感覺好強烈, 好驚!
當一切忙亂完, 我發覺自己全身震曬, 係由心裏面震到出嚟 , 好慘!
我最怕最怕就係面對狗狗抽筋, 嗰種情況真係十級驚嚇, 見住佢不受控制咁碌低, 硬曬呔, 超可怕!
我又唔想再用抽筋藥, 諗番叻叻當日情況, 就明白呢D藥對肝腎有幾傷, 控制到抽筋, 就拖挎成個身體, 每個器官衰竭跟住出嚟, 我曾經有過叻叻嘅經歷, 點會唔識預計 :(
所以一見達達開始有呢個症狀, 我切切實實咁feel到個心跌咗落谷底!
 |
| 胃口正常 |
又再一次求助順勢療法, 有無效用未可預知, 感覺如同飄流於大海中捉緊嘅浮木, 係目前我唯一嘅希望支柱, 希望達達可以夾到, 抽筋可以控制住啦!
希望順勢藥幫到達達唔使跟住叻叻嘅路行, 我再一次諗番叻叻仍然好心傷, 真係好難頂啊!
要麻煩Mi火速幫我從澳洲訂藥, 呢個係我僅有嘅一線希望, 望老天可以幫助達達跨過呢步, 亦唔好要我再重覆受呢個煎熬啦!
完全係一個無眠夜, 點瞓得著, send個訉息比Hsiang醫生, 問問意見!
半夜三更發出訉息, 諗住明早醫生瞓醒可以覆我, 教我點處理囉; 無諗過佢會半夜都覆我, 真係唔好意思, 衷心感激!
不過佢都話現階段無嘢可做, 要留心個頻密度, 每次抽嘅時間有幾耐再處理, 如果衹一次半次就觀察住!
一直觀察住都無咩事, 精神尚可, 胃口正常; 但唔代表我可以安樂!
琴日波波同豆b又肉搏, 都唔知點又整傷, 眼仔受創!
已經第一時間滴眼gel眼藥, 再撲出銅鑼灣問Mi借順勢藥, 好彩Mi好似有個小型藥庫, 又多得佢大力幫忙; 但今日都唔覺有好轉, 又驚!
但朋友話如果角膜受損要比D時間, 睇醫生都係用呢D藥, 咁我以前狗狗都遇過咁情況, 只要無惡化就等多兩日再講啦!
今年臨年尾都要攪到我雞毛鴨血, 2014快D快D過!
湊住呢3隻豬真係壓力大, 隻隻都咁多事, 真係大折磨😢
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
