 |
| 相片連結 |
天氣咁凍, 想同3隻豬出去望而却步, 咁大風真係會退縮!
琴晚聽到窗外超大風, 呼呼聲好似有風暴, 即使高掛颱風訊號, 無吹正我屋企方向, 都仲可以當佢無到, 但琴晚風聲好夠勁度, 個窗都震晒!
天氣咁凍, 對3隻豬無疑係一個大挑戰, 要出外真係有難度; 年紀漸大抵抗力弱咗, 保養要加強啦!
豆b嘅氣管到目前猶幸得保, 可能係我有小心監察住屋企嘅溫度; 波波氣管近來都唔見得好好, 佢雖然無氣管下塌, 但就敏感得交關, 溫度管理係重要嘅一環; 達達就未發覺有呼吸道問題, 但就成日瞓覺, 呢個都係踏入年長嘅徵兆喇; 亦有可能呢個階段佢身體特別差, 有唔舒服啦, 因為又見到佢全身都係D無晒生氣嘅毛髮!
每次到呢個週期佢都係心情惡劣, 樣樣都跟住變差, 如果跟住舊路去預測, 仲有幾個月要受苦㗎!
希望達達今次都可以一如以往差完再反彈, 我曾經試過咁多唔同方法, 都好似幫助有限, 對所有話"可行"嘅方法, 開始心淡!
 |
| 心情又開始差， 好少笑喇！ |
毛髮問題暫且擱下, 起碼見唔到有明顯不適啦, 我較為擔心係佢哋骨痛啊!
3隻豬都有不同程度頸、腰疼痛問題, 天氣凍會高危誘發, FB上見好多毛孩都出事, 又腰又脚仔痛到唔識行, 我心都翳晒!
唯有勤力D做保養, 密密出動3寶護法, 做物理治療啦!
 |
| 先做艾炙同照燈, 今晚再做場效應！ |
琴晚有個笑話, 阿女番嚟食晚飯, 一入門口隻豆就衝出去啦, 姐姐最鍚佢嘛; 阿女一抱起佢就問點解個身咁暖笠笠㗎?
隻豆就係咁典, 要典番落地下, 真係從未發生過咁嘅事, 好奇怪; 阿女一放佢落地下, 佢快速咁走去坐番個電暖墊, 原來佢同阿女對話, 話比阿女知佢剛剛坐呢度㗎!
呢隻人仔狗嚟㗎,古靈精怪!
 |
| 整個冬季都要黐住個暖墊 |
3隻豬近來真係少咗運動, 因為無出街, 都少咗行, 我又怕咁會血氣運行變差, 唯有每日都陪跑啦; 每晚拎住D小食引佢哋同我一齊跑, 由廳跑入房係咁兩頭轉啦, 達達跟唔到就衝咗入圍欄, 呱呱咁叫, 好攪笑啊!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
