 |
| 拜拜! |
真係好佩服某D朋友, 又要返工又要做家務, 照顧一家大細起居飲食, 仲要照顧得狗狗好好, 係咪超級超人嚟㗎?
仲有2星期左右工人姐姐就走喇, 續咗約都要離開都唔想再講個中因由, 當然都唔會係愉快嘅感受!
將會有一段長日子充當超人, 唯一係唔使返工, 比較易操控!
但話分兩頭, 呢個亦係我搵到好工人一大障礙, 正常去打工, 都唔想比老細鴿住曬啦, 我好理解, 有得選擇點會揀我呢份工? 變相我只會遇到D次級工人, 所以結果都預計到唔會好好, 都係闘耐力, 睇吓邊個先忍唔到!
忍咗2年, 忍完又忍當所有唔好嘅都睇唔到, 真係好難做得到!
事無大小講好講好, 一轉身就忘記得一乾二浄, 從無用心去做, 明明見到有唔妥又唔做, 我咁忍真係於事無補, 感覺忍耐都係吃力不討好, 好辛苦!
睇番之前寫嘅文章, 都仲有講佢無黑面駁嘴, 但呢D全都係維持到一年上下, 當然仲有D工人更差啦, 睇到有人講到僱主一出聲佢就答唔鍾意炒我呀 :(
我係咪應該阿Q咁講句, 我都未算最差!請到好工人感覺好似搵老公, 急都急唔到, 只可等緣份到, 我嘅真命天子好姐姐何時我先會遇得到?
真係好煩, 要揀個感覺對眼緣嘅工人已經難, 仲要傾好因為你係full time ma'am就唔做, 咁點辦?
又要再哽D籮底橙? 咁都預計到唔好嘅結果又循環, 用一筆錢又教到嘔血, 真係越諗越down, 痛苦啊!
工人要同僱主關係良好, 其中一個重要因素原來係唔可以係full time ma'am, 返咗工乜都見唔到, 放工攰到死就咩都是是旦旦, 見到地氈表面唔太污糟就算數, 千萬唔好掀開氈底, 話之養住一竇曱甴, 要係咁僱傭關係先可以維持到!
相見好同住難, 就算親人見得多, 都多咗機會有磨擦, 何況係工人吖, 我再無要求都比唔上出咗去嘅ma'am啦!
見到唔妥唔出聲就自己谷氣, 出聲講就一定破壞關係, 依家D工人姐姐點好聲氣都唔受, 一出聲就比黑面你; 好受氣啊!!
時而勢易, 受氣嘅往往係僱主!
以後一拖三同3隻豬出去更難, 都只可以落吓樓下, 還好佢哋唔太鍾意出街行, 落平台走一轉都OK喇; 應該會好忙, 用慣工人要自己做番好慘, 但事在人為, 我會慢慢習慣, 揾工人就慢慢啦, 又急又是旦結果一定仲惨!
大家遙距比D正能量我啦, 祝福我下次會遇到好姐姐啊!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
