 |
| 相片連結 |
真係激死, 已經唔係第一次!
偶然會睇吓自己個blog, 重溫吓以前寫嘅事, 呢個都係我寫呢個blog嘅原意; 點知click咗入去以前寫嘅文章, D相片位置開晒天窗, 以前都試過一次, 到底咩事?
再去睇番之前upload相嘅相簿, D相完全無晒踪影, 真係離奇!
本來寫呢個blog係娛樂吓自己, 無必要咁心翳, 但始終係我用心寫出嚟, 見到文章一個個空窗位, 真係想暈低!
我真係唔明究竟發生乜事, 電腦就係咁鬼靈精, 網上嘅一切總係無從預計; OK無所謂, 一切可以從新再嚟, 係要我再做嘅都無計!
要逐篇文章clicked入去睇一睇, 無咗相嘅跟住日期慢慢搵番出嚟, 然後整理好再番放上去, 當然要用好多時間同耐力, 但我一定可以做番齊, 反正無人迫我交卷, 我可以慢慢嚟!
或者上天覺得我性格係燥底, 比我多D去磨練耐性; OK無問題, 人力可為嘅我就慢慢嚟, 做得徹徹底底!
已經12月接近聖誕, 往年已經帶住3隻豬仔落咗去影聖誕相, 又喺屋企佈置好場景影一大餐; 今年發生好多事, 心情欠佳, 提唔起勁攪, 不過我點都會繼續, 習慣性影開過節主題, 唔想某年有唔齊!
 |
| 預祝聖誕快樂 :) |
天氣越嚟越凍, 帶3隻豬仔出外要特別謹慎, 吸入冷空氣刺激到氣管會好煩, 波波剛好番, 豆b氣管弱, 我唔敢玩!
今日同佢哋換番件厚衫, 夜晚驚凍!
 |
| 拆咗件帽舒服晒, 肯行喇! |
呢件衫其實好柔軟, 我係見到實物先決定買, 唔係睇圖片亂點一餐, 應該會選啱; 但我無留心件帽會頂住條頸唔舒服, 同佢哋換好衫, 3隻豬好似硬晒呔; 無辦法啦又要比耐性再加功, 將D帽拆晒, 即刻舒服番!
以後買衫要學識買無帽嘅款, 薄身嘅都無大問題, 厚嘅就唔好制, 佢哋頸多毛, 唔啱 ;)
真係所有嘢都要學習, 即使係買件衫, 要選合適嘅都要累積經驗先會選得啱, 適合其他狗狗未必適合呢3隻豬, 尤其波波著衫特別麻煩, 少少唔舒服都唔行, 我怕肌肉勞損啊 :D
每日都忙, 就係忙做呢D瑣碎事, 但唔做又唔得嘛!
 |
| 拆咗件帽舒服晒, 肯行喇! |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
