 |
| 相片連結 |
養呢3隻豬真係帶比我好多前所未有嘅挑戰, 亦有驚心動魄嘅塲面, 哈哈, 好似日日新鮮!
每個人都會經過高低起跌, 我就比呢3隻豬攪到我團圑轉, 或者上天係借佢哋引導我悟出做人道理, 叫我要做出一D改變啦!
因為佢哋, 我有咗新嘅領悟, 原來喺唔同領域都可以學到新知識, 從中會有新探索; 我亦開拓咗好多新hobbies, 之前唔會下㕑, 但為咗3隻豬, 勇於嘗試; 因為佢哋, 引伸出相關興趣, 例如做羊毛氈狗狗, 黏土手工, 為佢吔做吓小飾物, 仲會上網做好多research, 樂此不疲 :)
如果無咗佢哋, 我會去邊處搵呢D動力? 我會無所事事嗎?
或者有人會覺得我所做嘅事好無聊, 對社會全無貢獻, 但生活得開心都好重要, 能夠同一班狗友分享養狗狗嘅經歷, 可以用過去嘅經驗比大家參考, 我唔覺得係無聊 :)
我當然無可能做到豐功偉業, 但養狗狗能夠令自己咁滿足我之前係未可預料 :)
我成日同阿女講, 照顧好自己等同孝順父母, 能夠努力事業在我眼中已經係一種榮耀, 一個人唔做成別人嘅負擔好緊要!
乜嘢嘅人生先叫做有意義? 各人追求唔同, 我就只求開心平穏過日子, 小女人難成大業, 照顧好週圍嘅事就於願足矣!
最近睇咗一篇文章, 頗令我深思, 人生可以拉濶但唔可以拉長, 我哋喺有限嘅人生路上, 可以擴濶自己嘅世界; 當有一日行到人生路嘅盡頭, 但願可以無牽無掛咁揮手道別, 因為你已經過咗一個拉濶人生, 無恨無怨!
天氣寒冷, 喺屋企陪住3隻豬, 琴日睇咗一段講及狗狗變老嘅徵兆, 從3隻豬身上都見到幾個共通點喇, 例如毛質差咗, 面毛變白, 活動力減退⋯⋯
生老病死係不可逆轉嘅變化, 幾唔願意都要面對, 喺有限嘅日子盡量陪佢哋多D, 珍惜眼前人和事!
一家相聚嘅日子每一日都變得寶貴, 日後同呢3只豬嘅日常瑣事, 會濃縮、沈澱喺記憶裡面, 安穩咁藏喺心底!
睇咗呢篇文章, 好想同大家分享!
http://mingkok.buddhistdoor.com/cht/news/d/43379
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
