係我疏忽係我錯, 低估咗波波眼仔受傷程度 :'(
星期一都仲係唔覺好大件事, 係隻眼瞇瞇變細, 無紅無用手卒, 咁我無為意係咁大問題, 都去拎咗順勢藥處理, 滴咗眼gel以為會無事!
我都好小心, 明白眼仔損傷唔可以滴類固醇, 而以前我嘅狗狗都有用, 所以照跟進, 點知琴晚極速惡化, 佢好痛, 伸手未掂佢會尖叫, 開始用手去卒!
見佢無心機食野都知好嚴重, 行到有D失平衡應該嗰邊好痛, 但打咗好多電話所有診所都full, 連Hsiang醫生都滿晒攝唔到, 真係無晒乎!
捱到今早驚見佢眼仔流膿, 我個心好痛 , 係我衰判斷錯誤, 以為無事就focus住達達抽筋嘅issue, 我真係好自責, 好驚發炎嚴重, 萬一要摘除眼球我一定情緒失控!
一個早上惶恐中過渡, 波波你唔好有事, 唔好要媽媽咁傷痛!!!!!
到咗約定時間, 今次要見一個新醫生, 唔想再延誤, 睇得越快越好, 以前未睇過都要博一鋪!
呢個醫生係A朋友介紹, 評論呢個醫生都好好!
再多謝A今次又同我作伴, 今次係我主動要求佢同行, 我真係好驚個診斷結果我難接受!
診斷結果係波波角膜潰瘍, 已經穿透表層但尤幸未太深入, 其中有有一個錯誤嘅人為因素!
我一開始已經幫波波用頭套保護, 但我用呢種布制嘅頸圈對波波嘅狀況並唔適合, 雖然避免到佢用手卒, 但避唔到佢將個頭仔兩邊磨, 令佢二度創傷, 要改用番傳統頭套!
希望用藥後有好轉, 觀察2日情況, 無改善就要立刻覆診, 有好轉就可等一週, 返去檢查損傷有無埋口.
呢位Yeh醫生真係細心, 對我呢D每事問嘅人都容忍, 今次最大得益係遇到個好人!
講開好巧合, 原來5寶之前睇嘅Hu醫生, 曾經同佢共事於同一動物醫院, 令我我份外有親切感, 佢真係同Hu醫生一樣咁好人!
可惜Hu醫生依家於元朗應診, 對我嚟講真係太遠, 但我無忘記佢係叻叻嘅大恩人!
當日叻叻半夜嚴重抽筋, 係短時間連續數次, 我唐突咁半夜致電胡醫生, 係佢指導我點急救, 呢件事我一直銘記在心!
2014年除夕不幸中嘅大幸, 係遇到個好醫生!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
