 |
| 呢張新嘅珊瑚絨氈好軟好舒服㗎! 相片連結 |
好享受同3隻寶貝單獨渡過寧靜嘅星期日, 開住音樂放佢哋上我床!
幾隻豬已經習慣晒, 唔上去瞓一陣會嘈餐飽, 尤其係達達, 開大把招牌聲"吖"到你暈晒; 波波唔使講會作個憂鬱小生狀, 即使豆b明明唔enjoyed上床, 但都會望到實, 乜都要有份, 點都要上去瞓一陣間!
一定要還咗佢哋心願, 然後就可以放番佢哋入圍欄床瞓覺, 工人姐姐放假我要行開行埋, 唔睇住萬一由床跌咗落地, 真係骨都散, 唔好攪喇!
屋企靜D佢哋會瞓得好D, 尤其喺咁凍嘅天氣, 瞓多D差足電身體都會好D!
雖然呢個姐姐都做咗快兩年喇, 但波波同達達都仲係當佢賊辦, 一入我房就瞪大晒對眼!
有佢喺度佯嚟佯去, D豬仔要熟睡都唔容易, 佢哋要權當監察器!
工人姐姐放假唔喺屋企, 我係會忙D, 但心情真係好靚啊; 咁講好似好衰, 無咗佢幫手又唔得, 但有佢喺度真係麻麻哋, 呢個姐姐表現真係太強差人意!
但睇咗太多例子, 朋友同自己經驗話咗比我知, 依家D工人姐姐質素直線下降, 無最差只有更差, 請到好工人唔容易; 即使再請一個新姐姐, 就算從未出過國, 都已經唔會係一張白紙, 太多資訊誤導佢哋, 我留住呢個姐姐仲同佢續約, 真係萬般不得已!
我工人姐姐係懶惰同大意, 仲鍾意自己話事, 我都唯有跟多D, 無可能旨意佢做出好事, 不過....跟進當中真係好激氣; 但佢未差到貼地, 我暫時仲可以忍住度氣, 好驚請到D極品, 使咗錢仲要打官司!
我唔敢博, 喺香港外籍傭工關注組見到有案例, 提到請個工人左等右等, 等幾個月只做咗幾日就請辭, 原來工人健康有事, 本身有哮喘唔適應香港天氣, 到港前又剛做完做割膽手術, 又開過刀生B, 做傭工身體根本仲未適宜; 呢D出國驗身又可以當無事, 唔清唔楚咁嚟咗幾日又話唔做, 你話死唔死?
撇開工人質素問題, 仲有好多相關煩惱事, 呢件case嘅事主, 因為工人問題, 前後用咗4萬幾, 仲一肚氣!
唔係無好工人嘅, 亦一定有幸運嘅僱主, 之前我都曾經有過好運, 用過兩個好工人; 嗰時聽朋友猛呻, 又羨慕我幸運, 我仲一舊雲, 因為係初請工人, 以為工人守本份一定係咁 :p
嗰兩個姐姐都各做咗4年, 不過一個要嫁人, 一個又掛住個女, 一定要番菲律賓, 但呢D都係好耐以前嘅事喇; 新一代工人, 要佢哋安份守己好好做事, 真係唔容易喇!
自從取消咗外傭要付agent fee, 更做就咗好多博炒工人, 同好多無奈僱主; 樹大有枯枝, 好多姐姐聽人教唆玩嘢, 到香港一遊, 拎埋僱主機票同代通知金, 當旅遊咁做幾日了事; 仲有D衰到誣告僱主, 遇到呢D工人, 花盡金錢、時間、精神心力, 真係有苦自己知!
所以我忍得就忍, 呢個姐姐點唔好都未算太過份, 無傷害過3隻豬, 明知越忍氣越做就佢哋成為"公主", 肆無忌憚比佢哋食住, 都只可以嘆氣!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
