做成憾事

呢個袋夠大, 兩隻豬可以一齊爬低瞓覺

點解最近總係聽埋咁多不幸嘅事, 今日Mi講咗件事比我知, 又係一個意外導致狗狗離開嘅憾事!
呢個意外其實可以避免, 而且係一件好多人都可能疏忽嘅小事, 越普通就越容易掉而輕心, 咁就出事!


主人正在整理雜物, 小狗狗坐喺主人脚邊, 可能唔小心碰到茶杯, 個杯直跌落地; 主人無為意個杯係點樣跌, 回頭只望見地面嘅碎片, 而狗狗就昏咗喺碎片旁邊! 

主人諗應該係個杯先擊中狗狗, 再跌落地, 狗狗承受嘅撞擊力可能唔細; 主人立刻送狗狗急診, 但急救後都救唔番, 一隻茶杯就奪去咗一隻小狗狗嘅性命! 
大狗都可能有機會承受到呢種撞擊力, 最多受傷, 但呢隻狗狗體重得3.5磅, 太嬌小喇!
 
今日有事要出去,  但唔敢放低3隻豬, 本來將3隻豬困入圍欄, 應該唔會有事, 無奈波波同豆b有時會貼錯門神, 一擔沙糖一擔C, 如果打起交工人姐姐一定唔識處理; 但我唔敢好似以前咁唔困豆b,  留豆b一個喺廳行嚟行去, 好驚會出事, 事關呢個新姐姐根本唔習慣屋內有呢D小狗,  佢性格大而化之!
每次見佢起步我都擔心, 好驚佢一脚踢到D豬仔飛起, 每一次見佢行得咁大步我都要提點住, 叫佢要望吓左右隔離, 我就係怕意外做成憾事!
每日講無數次, 一直講、講、講, 講到佢記得為止!

今日有事要出去， 我別無選擇, 唯有帶埋隻豬啦, 本來想只帶波波, 達達同豆b放圍欄內困住, 同姐姐無接觸應該唔會出事！
但達達一向欠缺安全感, 見唔到我會唔安心,  之前出去從webcam都見佢唔停咁行嚟行去,  見佢咁我肉赤到死！
唯有帶晒兩隻豬, 留豆b一個用圍欄困住,  反正呢隻豬都係瞓覺好少理！

之前webcam cap 圖,  見到波波達達都望住大門, 達達全程企喺度, 豆b就瞓覺好少理

我寧願事事小心D， 好過比應該避到嘅意外發生, 到時唔原諒自己！



多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！