 |
| 精神好咗D |
早兩日豆b嘔, 我真係好擔心, 本來狗狗間中有一次半次嘔吐, 唔係好嚴重嘅事, 只要精神狀況良好, 無持續出事就OK; 但今時今日嘅豆b, 有嘔吐可以係大件事, 有少少異常我都會比佢嚇死 :(
為咗減輕佢腸胃負擔, 再細分少食多餐, 幸運地呢兩日無再出事, 但胃口唔好, 完全唔肯自己進食, 還好手餵時佢都肯吞落去!
但係...我面對呢種情況唔係第一次, 完全無意願進食可以捱幾耐日子? 腦中浮起嘅畫面, 徹底心碎:'(
心情直跌谷底, 抖起精神再用細針筒, 小心慢慢餵呢隻豬; 用細針筒嘅好處, 係即使佢吞嚥遲緩, 都唔會出大件事, 唔會咁易'續'親佢!
好多謝Am, 自己於美國網購會想起豆b, 知道我需要密密用針筒, 靜靜咁為我做準備 :)
琴日收到佢速遞比我嘅一盒針筒, 祇係極無奈, 講到口水都乾, 佢都係唔肯收費, 我被迫又欠下一個人情; 但真心多謝呢個朋友, 有形及無形嘅支持!
豆b情況好似越嚟越差, 我心理係有預備, 但接受現實.....唔係講咁容易!
好彩豆b唔肯食正餐, 暫時都仲對布緯食療有D興趣, 希望堅持落去可以有奇蹟啦, 不過遇到奇蹟又點會咁容易 :(
深呼吸, 唔好咁快認輸, 要慶幸每每到山窮水盡嘅時候, 又總會發掘到新嘅source, 我但願.....Budwig Diet真係會幫到豆b!
琴晚發惡夢, 夢見豆b要離開我喇, 半夜就比呢個夢魘驚醒:'(
不過朋友安慰我, 現實同夢境係相反嘅, 即係豆b唔會咁快離開, 叫我唔好諗咁多, 壓力咁大好唔係好事!
多謝好朋友安慰, 但豆b情況有幾壞, 我心中有數, 要安然渡過呢段苦日子, 唔係件容易嘅事, 我會更好咁珍惜同豆b相聚嘅剩餘日子!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
