琴日收到早幾日訂購嘅順勢藥, 見到嗰樽transition ease, 個心好悲涼:'(
慢慢一樽樽拆包裝, 突然見到一支藥廠送比豆b嘅藥, 佢哋知道呢隻豬仔近來胃口麻麻, 特別為佢custom made咗枝開胃藥; 拎住呢枝療劑, 個心好溫暖!
我用順勢療法係選擇正確, 喺豆b唔受得西藥情況下仍可以有個幫助, 起碼呢段日子以來, 豆b無特別明顯嘅唔舒服, 雖然佢日漸消瘦又甩毛, 但仍算得上係精精神神; 從豆b第一日確診, 醫生都話咗好返係零可能, 咁選擇令佢生活得安穩, 係我最大嘅責任!
Video: 豆b食雞肉 :)
更慶幸認識到呢間藥廠(呢個要多謝Mi嘅好介紹啦), 會在我無要求嘅情況下, 主動送適合嘅療劑幫豆b, 遇到咁有心嘅順勢醫生, 豆b好幸運!
其實....我到底係幸運還是不幸?
幸運嘅係我終於算搵到一個有愛心嘅動物整體醫生, 對我描述豆b嘅病況有上心, 每次訂藥都會適當調整藥劑, 盡量做到藥物對病情吻合, 但美中不足嘅係, 始終靠越洋問診, 一切身體檢查嘅數據, 仍然要靠本港嘅醫生!
不幸在於我一直尋尋覓覓, 在港我仍未揾到一個夾到我要求嘅醫生, 可能客觀條件影響, 要佢哋根據主人嘅意願做配合係無可能; 香港比較"好"嘅獸醫都忙到頭暈, 由開診忙到過晒診症時間都要應診, 要佢哋慢慢同你研究個病例有乜可能? 出面候診室各個主人都已經等到抆!
獸醫都只係一個有血有肉嘅常人, 一樣需要休息減壓, 我咁嘅要求係咪好過份?
我感覺我遇過嘅醫生, 都會根據病情開藥, 大都算做到對症下藥, 不過, 藥物對個別毛孩身體是否可以承受, 就無咁上心; 我唔係醫生, 唔係質疑佢哋嘅專業學問, 我只站喺自己係毛孩媽媽嘅角度去諗!
網上各群組聽到太多事例實在寒心, 有太多唔負責嘅壞醫生, 有違醫者父母心, 更無醫療嘅熱忱, 可能時間耐咗已忙到變咗個機械人, 漸漸對答流於書本上嘅學問, 所謂依書直說, 何勞再為個別情況去煩心; 現實磨人, 已經忘記初心, 忘記醫生有嘅使命感!
可能外國嘅醫療制度唔同, 作息有分別, 就影響咗決斷, 喺香港可以遇到一個夾嘅好醫生, 係何奇幸運!
我由養5寶開始, 一直走到目前, 實在有好多改變; 以前養狗狗乜都唔識, internet又唔似目前咁方便, 只知毛孩有病就帶佢見醫生, 100%聽從醫囑就盡晒責任, 從來無諗過藥物對身體嘅影響有幾深!
永遠唔會忘記叻叻嘅不幸, 一個個器官因為各種藥物, 如骨牌咁冧!
今日一打開電腦上互聯網, 有各樣唔同嘅知識, 開始對整體治療更關心!
世界上萬事萬物都難兩全, 一定拗唔過生老病死嘅局面, 西藥唔會係萬能, 另類療法亦未必一定夾, 用任何治療方法都只係殊途同歸, 不過因應個別病患, 未嘗唔可以有多一個選擇!
我信一切主宰由天, 當時日到咗你做幾多都係徒然, 但可以選擇過渡得較舒適, 何必局限於偏見!
當然, 我承認以往嘅經歷, 影響我睇法係最關鍵!
最近網上有一段廣播, 聽咗會唔會對大家嘅睇法有改變?
http://www.naturalhealing.com.hk/zh-hk/content/?c=169
http://www.naturalhealing.com.hk/zh-hk/content/?c=443
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
