 |
| 相片連結 |
3隻豬仔都麻麻煩煩, 豆b係老大, 佢麻煩最大, 身體健康最壞, 表現反反覆覆時好時壞; 波波係同胎細佬, 都應該具有相似嘅基因圖譜, 所以都係麻煩, 試紙都驗到有尿蛋白, 祇係無豆b咁嚴重啦; 尿比重同酸鹼度都唔算正常, 雖然唔算好差, 但都係腎臟老化嘅指標啦; 達達嘛, PH太鹼性, 又有白血球, 膀胱尿道炎都係有D反覆, 如果唔攪好又直接影響腎臟喇!
呢3隻豬快將接近10歲, 真係咩病痛都開始出晒, 斷斷續續一個個出現更多麻煩!
其實要早期審測佢哋身體健康都好難, 即使我每年驗血都係假, 明明驗血一切都唔算差, 但豆b一病發已經咁難攪, 原來驗血, 驗小便, x-ray, 超聲波少一樣都可以有好大偏差!今次豆b驗血同x-ray, 其實兩個醫生都話OK㗎, 但一驗尿同做完超聲波, 個結果會係咁差, 差到近乎要寧養治療啦😢
毛孩如果無任何病徵, 正正常常食得瞓得玩得, 有幾多人會覺得需要攪咁多嘢呀? 將小朋友反來覆去咁檢查, 佢哋驚驚媽媽都肉赤啦, 分分鐘越攪越差嘛😖!
今次豆b胃口唔好, 係有異常我先會帶佢去睇獸醫追縱檢查, 其餘兩隻豬睇落一切正常, 食得瞓得嘈得, 達達仲爆返晒毛髮, 我點會懷疑佢健康有問題呀?
如果今次唔係因為豆b, 我都唔會買驗尿試紙追縱, 咁乜都唔發覺啦! 雖然都有獸醫話試紙唔準, 但做早期檢測我覺得好OK啊!
波波同達達我可以及時用順勢療法, 再加有關嘅supplement去幫助, 總好過好似豆b咁, 一有事已經咁嚴重啦!
至於豆b, 實在好反覆, 不過精神真係差咗, 體重亦有減, 其實心中有數, 條路會係點行; 但有時我會充滿希望覺得佢仲可以挺得住, 但有時佢又差到我覺得都係時日無多喇!
路仍未走到盡頭, 未到最後, 治療方法我仍會繼續搵, 我點會係咁易放棄嘅人啊!
祇要豆b仲肯食, 仲可以好好咁瞓, 我就咬緊牙關陪住佢努力奮鬪!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
