豆b今日火化, 老公同阿女都請咗假, 為咗送別呢隻傻bb啦!
今日之後, 我就真真正正唔會再見到佢實質嘅形體, 唔會摸到佢柔軟嘅毛髮, 當將按鈕按下嘅剎那, 一切就灰飛煙滅喇!
好傷心, 別離係人生最痛, 但唔好喊, 眼淚會做成豆b嘅牽絆, 我要忍忍忍, 忍住眼淚帶笑送別豬豆啦; 唯一可安慰自己, 過一吓我就可以帶豆b嘅骨灰返屋企, 從此佢會永遠陪伴住我, 應該覺得安慰喇!
 |
| 再一次為豆b做餅食 :) |
今日一早起身, 為豆b做cupcake同芝士餅, 仲要記住帶番薯同佢最愛嘅零食, 依家佢已經無病無痛, 一定變返隻為食豬仔喇; 之後出去買鮮花, 呢個女雖然傻吓傻吓, 但極貪靚㗎, 要比小小一束鮮花陪伴, 小豬豆靚靚咁上路啦!
好多謝A, 記住豆b鍾意食blueberry cake, 琴晚放工專程去餅店買餅, 仲送到過嚟, 叫我今日要幫佢帶比豆b, 呢份心意實在感激; 佢一定記得呢隻豬其實一向為食, 買多咗個紅蘿蔔味, 豆b都真係有福氣, 有咁多人鍚佢!
仲要多謝提出要送別豆b嘅朋友, 但我哋都係想一家安安靜靜咁同豆b話別, 而我諗豆b都想大家記住佢嘅甜笑, 唔想你哋見佢瞓著咗嘅表情, 大家嘅好意心領!
約好時間, 準時到達, 寵物善終安排咗個房間, 等我哋同豆b安靜咁道別; 小豆b好靚女, 面容安詳咁瞓覺, 我輕輕再三撫摸佢嘅毛毛, 仍然光滑; 再輕握佢嘅小脚掌, 仍然好柔軟呀, 好心酸😢!
雖然叫自己唔好喊, 但面對住佢, 又知道好快就要永別, 一吓子往事一幕幕湧上心間, 甜酸苦辣如五味架打翻!
然後, 最心碎嘅儀式, 我親手按制點火, 淚如雨下😭; 見到熊熊烈火將豬豆包圍, 但我知豆b已離開肉體成為天使, 唔會痛喇!
豆b飛啦, 一路好走, 要小心照顧自己, 唔好再牽掛媽媽, 祇要乖乖咁喺彩虹橋上等媽媽就可以喇!
S媽媽叫我傳話, 祝福你永遠幸福快樂, 再無痛苦, S媽媽永遠愛豬豆啊!
可愛嘅小乖乖, 記得要開開心心咁生活, 帶住好多哥哥姐姐嘅祝福, 你好幸福; 記住你永遠係我家嘅小豆, 媽媽, 爸爸同姐姐都永遠愛你啊💕!
 |
| 大家記住豆b傻傻嘅笑樣, 佢已經係快樂小天使, 瞓著嘅樣唔好睇喇! |
