近來天氣真係差, 身邊幾個朋友嘅狗狗都因為氣管下塌出現問題, 而FB上亦見到近排真係多咗狗狗氣管心肺出事; 豆b又間歇有返扯氣, 波波同達達呼吸都有D怪聲, 碰上呢D情況自己都好警惕!
松松氣管差係一般常見問題, 而3隻豬已經係老友狗狗嘅階段, 喺照顧上我係多咗壓力!
琴日FB有個測試, 問咗10個問題, 睇睇自己係咪比壓力壓緊落嚟, 我係完全中晒, 哈哈, 壓力到爆燈狀態 :')
近排自己都成身痛, 天氣差加上壓力大, 我好驚3隻豬仔筋骨肌肉有負擔, 密密做保養唔敢偷懶!
波波呢幾日胃口差, 希望係天氣影響啦, 我依家好似乜都卸落天氣比個excuse自己, 真係好怕佢又跟住豆b尾出事, 一對twins基因接近有相同病患唔出奇, 唉, 步步進逼越諗越想死!
眼仔問題告一斷落, 新嘅挑戰又嚟, 點解總係唔可以比我透啖氣!
豆b確診已經過咗7個半月, 喺呢段日子90%時間都係靠針筒餵食, 偶然自己肯自動去食我好似見到奇磧, 又影相又拍片要留下痕跡; 呢個咁平常嘅舉動, 原來係教我身邊嘅一切要好好珍惜, '幸福唔係必然'嘅一個引證!份
我好欣慰豆b嘅努力, 雖然我唔覺佢健康情況有改善, 但佢肯配合我為佢做嘅密密流程; 即使無意慾去進食, 都肯接受我餵食!
多謝老天比我見到少少成績, 豆b嘅體重已經回復正常, 算係一個奇蹟, 令我以後會更有動力!
3隻豬, 從小小年紀一轉眼變老大, 人一生中有幾多個伴侶可以不離不棄, 忠誠交心咁陪伴自己走過10年嘅光景?
望住佢哋少咗嬉戲多咗瞓覺, 好感慨流金歲月已一去不復還, 睇返以前嘅相, 個感覺好想喊!
 |
| mp4:流金歲月 |
