豆b嘅抗病路程告終, 琴日早上奔向彩虹橋開始新生活, 祝願豆b再無病無痛, 開開心心踏上新旅途!
同親愛嘅豆豆話別當然心痛, 但亦安慰小豆b離開於睡夢中, 安詳、平靜, 無尖叫無表情扭曲; 我不捨難過傷心之餘, 亦欣慰佢終於脫離病魔操控!
好多謝好朋友Ka同豆b傳心, 令佢最後心願得以滿足, 小朋友係隻貪靚豬仔, 佢話要著條靚靚粉紅色裙仔上路; 最重要係比我提示, 話比我知小豆b係時候離去喇, 令我無錯過小乖乖嘅生命告終!
多謝Ka為我哋傳話, 豆b同我講多謝媽媽咁鍚佢; 但豆b, 媽媽更多謝你帶比我多咗好多笑容!
其實我通宵抱咗佢兩晚, 佢一直硬撐, 老公話佢唔捨得, 叫我放低佢啦; 我放咗佢入氧氣箱, 有咗氧氣幫助, 佢無氣促, 呢部制氧機起咗佢最大作用!
佢轉身背住我, 靜靜咁瞓覺, 我一直陪伴喺佢身邊, 早上6點幾我摸吓佢, 佢已經進入昏睡狀態, 無反應唔郁, 祇見個肚仔仍有起伏.
 |
| 豆b指定要著呢條裙仔 |
之後, 我去咗洗手間, 轉頭我嘅世界就已經完全唔同, 豆b靜止晒....
佢都係唔想我見住佢離開, 呢個女太貼心喇!
我意識到我真正失去我嘅傻豆豆喇....., 好心痛好難受, 坐咗落地勁喊....
今日, 8號風球高掛, 豆b係咪預料到? 佢知道如果佢今日走會帶比我煩惱? 佢每件事都為我設想週到 😢!
 |
| https://www.facebook.com/niku790305/photos |
從豆b確診, 醫生話再無咩可做, 叫我比佢食佢鍾意食嘅, 喺餘下嘅日子好好咁生活; 呢段日子以來, 我一直用順勢療法, 慶幸得保佢仍有正常嘅生活, 佢活多咗8個月, 過渡咗佢嘅10歲生日, 我已經好滿足!
 |
| 可愛嘅傻豬豆, 媽媽愛你! |
多謝豆b無怪責媽媽嘅堅持, 努力配合同我一齊戰鬥到最後一分鐘, 我諗佢一定有一位Guardian Angel, 喺呢段期間帶領佢走咗更遠嘅路!
當日Ka為我用oracle card比我提示時, 我就決定要做呢條短片, 好好懷念昔日豆b同我共渡嘅快樂時光, 仲有佢傻豬一樣嘅燦爛笑容!
當日一路揀相一路望住仲陪伴喺我身旁嘅豆豆, 想像佢將會離開, 眼淚已經失控 !
 |
| **mp4: You Belong to Heaven** |
雖然我一直心裡有數, 打從醫生判斷佢病情係嚴重, 我一直都有心理準備, 已經睇好多有關書本, 盡量消化內容, 叫自己要好好珍惜, 同佢共渡嘅每一分鐘!
我曾經多次送別親愛嘅毛孩, 我相信自己可以處理從容, 但對於生離死別呢種痛, 真係點預備都無用, 事到臨頭嗰種痛, 唔識形容!
又再一次親手將親愛嘅毛孩交托到寵物善終, 再三撫摸小豬豆嘅毛髮, 令我傷心眼淚再失控😭！
小豆b嘅氣味、儍更更嘅面容、觸手柔軟嘅毛髪、催食轉圈嘅叫喊, 一切一切, 從此只可以回味於夢中!
多謝一直關心豆b嘅朋友, 多謝你哋對豆b嘅病比相關資料, 喺呢段期間嘅支持鼓勵, 我會銘記心中!
今日....小豆b雖然離開喇, 但我唔會忘記佢甜甜嘅笑容, 傻更更嘅模樣會永遠烙喺我心中!
 |
| https://www.facebook.com/niku790305/ |
