豆B離開咗6日喇, 自從見過佢後, 感覺安樂咗好多!
療傷真係需要時間, 今日我已經無之前咁不停喊, 當然感覺都係唔習慣; 尤其係收到之前訂嘅嘢主要係為咗隻豬豆，依家收到, 別有一番感受, 就難免會眼淚流！
琴日收到訂比3隻豬嘅冬天衫, 豬豆已經用唔著喇, 佢應該唔會再怕凍, 彩虹橋上會係四季如春; 但望住嗰幾件衫, 眼淚再失控😢 !
今日又再收到個攪拌機, 呢部機我係特意買比豆b, 因為說明話係專做嬰兒食物, 刀片較低, 就算量少都打得滑; 我一見到描述已經立刻買, 希望打得幼滑豆b會更易入口, 用針筒泵都少D麻煩, 唔會塞住難出嘛!
唉, 一切都遲咗喇,仲有從美國訂比佢嘅嘢都未返, 時不時接受呢種衝擊, 真系么心么肺咁痛啊!
一個朝夕相對, 從無分開過咁一齊生活咗6年時間, 仲要咁黐纏嘅豬豆, 要放開真係好難; 日常生活嘅每一個細節都會勾起無數回憶, 心痛嘅感覺無減!
