遵從Dr Chow 吩咐, 幫波波停滴眼藥, 今日返去覆診喇!
今日比上次約咗較早嘅時間, 上到寵物醫院見到比上次多人, 正確講應該係多人陪同一隻狗狗求診, 跟住又有另一隻狗狗同埋主人, 而呢位主人拖住狗狗兩頭行, 波波開始睩大眼喇; 我都明白咁會刺激個仔, 都打算抱佢行開吓, 正在猶豫可以去邊度等候, 當我兩頭望搵緊隱蔽地方, 波波已經比晒反應, 大大聲吠喇!
姑娘瞭解後知道呢個仔咁鬼麻煩, 比我哋入房等候, 半掩磨紗玻璃門, 剩低我哋兩個靜靜等; 我細細聲開咗手機嘅relaxed music, 波波好快calm down!
真係貼心嘅安排, 喺咁寧靜嘅環境, 波波咁吠我好尷尬嘛!
等咗一陣間, Dr Chow親自過來帶我哋入診症室, 佢問做乜波波今日咁激動, 吠到嘈晒 ;)
做咗一連串檢查, Dr Chow表情比上次輕鬆, 多咗笑容, 佢話波波眼仔結構正常, 除咗有少少老化, 係健康嘅眼仔啊!
今日量度咗好幾次眼壓, 因為波波眼仔大, 眼球有D凸, 佢話量度嘅角度要好小心, 稍為偏差就結果唔同晒, 今日度數係17, 左右眼度數一致, 實在太好喇!
Dr Chow話無需要再覆診, 更無需要擔心, 亦無需要長期滴眼藥水, 不過波波眼仔較敏感, 有需要時可以用敏感眼藥膏就得!
佢都講咗乜情況下要留心, 青光眼唔控制會好快惡化, 不過波波眼仔目前係無須擔心!
多謝Dr Chow詳細講解, 睇咗專科真係信心大, 安樂晒 :)
