 |
| 貼心嘅小天使 |
老公主動同我提起豆b, 除咗叻叻走時佢有講起, 同咁多個毛寶貝永別, 佢都唔會再提起傷心事; 但叻叻好懂事, 所以呢個仔走後我哋傷心咗一段長日子; 唔係其他嘅唔錫, 但比較起叻叻嘅善解人意, 係唔同D!
 |
| 從一開始接手湊豆b, 老公已經每日都抱佢! |
今次, 佢提起豆b, 眼濕濕要用廁紙擤鼻!
佢習慣每日都會抱吓豆b, 同佢傾偈鍚吓佢, 佢話豆b走前嗰日嘅眼神好難忘記; 我都唔會忘記, 豆b要走佢自己已經知, 佢望住我哋嘅眼神充滿感情依戀, 係好唔捨得離去; 佢對我深深注視, 然後擰轉頭望住老公, 嗰個情境, 我完全明白今次唔會再有轉機, 從來未見過佢咁望我哋, 好似要將我哋鑿入心裡!
以前嘅5寶, 有叻叻識讀心, 有感情有思想有堅持, 為咗最後一次要見阿女一面, 拼命留住最後一口氣, 直到見到先舒出最後一啖氣!
今日嘅3隻豬, 最懂事係豆b, 佢初初跟我時無乜規矩, 乜都搶閘乜都好少理; 波波呢個仔唔鍾意佢, 明明萬千寵愛只在一身, 點解嚟咗個豆b, 又唔似達達咁讓佢; 達達更加憎佢, 成日主動搵波波嬉氣, 搞到波波少咗理佢!
呢個傻豬豬乜都唔知, 咁當然如果你要蝦佢, 佢一定還擊, 睇住3隻豬相處嘅模式真係好得意!
但對外, 佢一直都係親善大使!
 |
| 臨走嘅日子越近, 同胎姊弟先開始親近 :'( |
時間過去, 豆b習慣咗我哋嘅生活模式, 已經變得性格溫和唔會主動鬧事!
雖然豆b只跟咗我6年, 但最黐纏係佢, 佢不斷要求關愛, 但分寸會知, 明知波波最妒忌, 佢想媽媽鍚都會排隊, 梳毛等波波達達做完先會行埋嚟, 唔會再好似從前咁乜都搶住!
不知不覺間我變得好鍚佢, 一個咁貼心嘅傻豬, 一叫佢即刻飛撲過嚟, 永無扭計; 人嘅感情好互動, 佢嘅付出得到回報, 我好鍚呢粒女... 甚至不自知; 直到今次佢得病, 係我嘅心痛話比我知!
今次豆b有病, 我無時無刻都諗盡方法去幫佢, 我實在唔捨得佢咁快離我而去....經過咁多努力, 仍然要面對再無希望嘅小豆b, 我唔想佢辛辛苦苦硬撐落去; 好不捨, 但我愛佢, 好愛好愛佢; 我比訊息叫佢離去, 要媽媽睇住佢辛苦我真係過唔去!
終於, 豆豆b選擇呢個時間離開, 佢唔要媽媽睇住佢被折磨而心碎, 佢安詳, 平靜咁於睡夢中離去; 到死, 佢都為媽媽設想, 圓咗媽媽嘅心願, 我每日都祈盼住, 要豆b走, 都要舒舒服服, 最好瞓著咁去...
豆b豆b, 但媽媽真係好掛住你, 每想起你都難過落淚, 你依戀嘅眼神揮之不去!
你要記住媽媽同你嘅約定, 他日再做我嘅女女, 再重逢時你唔可以再離我而去!
 |
| https://www.facebook.com/niku790305/ |
