3隻豬做咗兩日氧氣光療, 見唔到乜嘢特殊效果, 不過如果我講話有好明顯嘅分別, 就太神化咗喇 :)
不過我都留意到豆b有D相關反應, 琴晚我準備比佢哋做多次氧氣光療嘅時候, 剛拎起部機嘅插頭, 準備接駁電源, 豆b已經好快衝咗入個籠, 爬低準備好吸氧氣 :)
可能佢覺得呢個保養對佢合適啦!
 |
| 豆b好relaxed, 通常吸吸吓就會瞓著 :) |
一直聽聞話動物好聰明, 知道自己有乜嘢需要, 而識作出相應調整; 除咗見到呢個例子, 琴晚剛睇咗一篇有關毛孩肝病飲食指導, 我就懷疑豆b嘅偏食, 係咪有根據㗎? 佢咁揀食係因為自己身體嘅特殊病情?!
文章內容話當犬貓有肝臟疾病會減少膽汁疏泄, 唔怪得上次豆b照超聲波話膽有沉澱物, 膽汁杰撻撻啦; 綜合葉醫生, 樊醫生同澳洲bioscan斷症, 都話佢肝差過腎, 呢個情況頗刎合.
Link: 犬貓肝臟疾病飲食及料理
而某類食物營養會加重肝臟損害, 肝病要減低銅嘅吸收, 原來羊肉, 鴨肉, 三文魚都係高銅嘅食物, 所以豆b轉晒胃口唔肯食呢D肉喇; 反之牛肉乳酪係低銅, 火雞同雞肉係中銅, 呢幾樣都間中唔使手餵, 佢會肯自己開動; 但高銅嗰幾種, 就餵到入口都吐返出嚟, 攪到D毛毛好污糟, 當時真係激到我跳舞 :(
我為咗怕成日反反覆覆, 幫佢又洗又梳, 快將佢卒到甩晒毛, 已經無再買嗰幾種肉, 果然佢係知道呢D肉唔啱佢食用, 就用佢嘅方法表達, 直到我領悟!
今後佢哋唔食嘅我要記低, 自己實在唔識某D食物同個病係有抵觸, 雖然我已經猛睇資料, 但都係甩甩漏漏記唔齊; 從今以後佢哋唔食嘅就唔再強餵, 集中搵料研究佢哋鍾意食嘅要點去控制 :)
呢個係一個新方向, 由佢哋做主導揀選所須, 帶引我去準備適合嘅膳食比呢3隻麻煩豬仔!
 |
| 波波表現比之前好, 但都係唔肯瞓低 :( |
 |
| 哈哈,達達突然大叫, 嚇我一跳, 抱佢出黎原來係要去尿尿 :) |
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
