3個月前豆b曾經情況好壞, 我以為佢好快會走喇, 當時剛見到有木材移印教學, 我想嘗試吓, 為豆b準備一個新居, 一旦佢唔想再撐, 我會比佢選擇!
買咗呢個書型嘅木盒, 為豆豆bb比心機做手功, 第一次嘗試學做圖片移印, 所有過程都因為有愛支持!
呢個書盒做好咗有幾個月喇, 我係幾咁希望, 過多幾年先用得著啊!
所以...做好後我無去畫圖寫字!
但終於...都要面對唔想到來嘅日子😭
呢本書, 裝住小朋友一生精彩嘅內容, 我要用心記載, 認真去做好佢!
搵圖 - 搵一個平靜嘅湖景, 等豆b可以安安靜靜咁生活!
搵字 - 代表我真切嘅心意, 希望佢時刻記住; 再見, 只為下一次重逢!
豆b離開咗幾日喇, 心情稍平伏, 懷住思念嘅心情開始為豆b畫肖像, 雖然畫功唔成熟, 畫得唔太似, 但一筆一畫親手將豆b加上, 我覺得好幸福!
琴日帶咗豆b返屋企, 今日就幫佢換新屋!
 |
| 豆b移居呢度! |
多謝豆豆bb到來陪伴媽媽, 傾盡你所有嘅愛, 完全可以感受到你對媽媽嘅信賴!
回想過去嘅溫馨時光, 又好似見到你跟隨在我嘅腳邊, 每步都緊貼住媽媽唔離開; 豆bb一向都最黐媽媽, 即使我去一敞洗手間, 你都要等在門外, 我曾笑言你似係我嘅拖鞋, 今後媽媽無咗呢雙咁溫暖嘅拖鞋, 媽媽雙腳一定份外冰冷; 無咗你小小嘅身軀再為我等待, 我感覺好孤單!
 |
| 豆b, 你有返過來, 對嗎? 想同以前一樣咁等媽媽? 乖豬豆, 放開上路啦, 唔好再牽掛媽媽! |
豆豆b, 遺憾我哋相處嘅時間實在太短暫, 只係短短6年, 你就離開喇, 如果媽媽之前做得不足, 愛得不夠, 請原諒媽媽, 但媽媽今次係已經盡力去鋪排, 為你揀選一條比較舒服嘅路去行!
一直好黐纏媽媽嘅豆b, 今日你要一個先走喇, 你要學會獨立, 學會堅強去適應新環境啊!
彩虹橋上會有好多新朋友, 你唔會寂寞㗎; 仲有你嘅親父母, 你嘅哥哥姐姐, 你以前相識嘅朋友仔, 佢哋會照顧你啦, 所以, 乖寶寶, 你唔使怕!
雨後有陽光, 媽媽流住眼淚仍將微笑掛, 我嘅乖豆豆以後唔再需要食藥喇!
你要開開心心喺彩虹橋上守候媽媽, 我哋一定會再重逢, 我哋約好㗎!
豆豆b, 愛你, 你會永遠活喺媽媽嘅心裡面, FOR EVER AND EVER💖💗!
