 |
| 豆B最受落,最relaxed! |
買咗部制氧機, 比3隻豬仔吸吓氧氣, 純為保養作用, 等身體細胞多D得益; 呢部係家用制氧機, 救命就唔係用呢D😊
其實好耐之前都有同A研究過想買部制氧機, 大家嘅狗狗都氣管唔好, 都擔心會出事, 後來又諗好似過份擔心, 就不了了之!
早前佢狗狗突然喘氣, 要即刻入住太平道醫院聞氧氣, 經過藥物加埋氧氣治療, 得以康復出院, A先可以鬆返口氣; 其實氣管下塌係結構性問題, 好難會完全正常無事, A覺得目前買部制氧機係有必要, 起碼做多個安全措施, 希望得保平安, 過D安安樂樂嘅日子啦!
我有問過佢效果如何, 講真如果有人問我同一問題, 我實在比唔到答案, 狗狗又唔識講, 邊可能知佢感覺😊
不過A仍觀察到狗狗脷仔顏色變好, 算係好唔錯喇!
然後Ka, 佢keep住每星期帶狗狗到寵物診所做色光氧氣, 佢話每次佢嘅狗狗胃口唔好,做完呢個治療都會肯食; 佢相信色光治療加氧氣對身體有幫助, 事實佢又真係見到結果正面如預期!
叫我每星期帶3隻豬出去做治療我會無氣, 而且波波達達好難服侍, 要困陌生嘅籠45分鐘唔容易, 如果從頭吠到尾, 又緊張到死, 效果差都可預知!
綜合咗兩個老友為狗狗做嘅護理, 我決定買呢部制氧機, 型號就跟足A :)
呢部機可調較30 - 90%氧氣濃度, 不過氧氣流量, 當然同醫療用嘅唔可以同日而語.
我對呢D完全唔熟識, 要聞幾多%去保養, 聞純氧又驚肺部頂唔住, 凡此種種咁深奧, 我聽到亂晒龍, 都係跟呢位science老師保險D :)
A當然都有做過research, 我深信佢唔會攞自己個寶貝女較飛, 呢種情況下跟佢實無衰 ;)
 |
| 豆b瞓著咗 :) |
用返個細籠加透明膠密封, 留通底部疏氣, 每日比3隻豬入去逗留2次, 用埋E-Acu微能量色光加上氧氣, 早晚吸20分鐘; 喺屋企唔會緊張, 輕輕鬆鬆咁做保養, 即使做唔到診所嘅光療效果, 做到50%都於願足矣!
但願呢個保養對佢哋有幫助, 會得身體健康D!
 |
| 達達都OK嘅, 肯坐定定吸氧氣 :) |
兩個女似乎好鍾意, 入籠聞咗一陣會瞓低, 表現得好relaxed, 波波一貫係緊張, 困住佢就坐到直直, 不過都OK, 起碼識不時將個鼻仔對住個出氣位置 :)
 |
| 自己屋企都咁緊張, 出外面咪嚇死, 怕咗佢! |
我要再強調我為3隻豬做所有保養治療, 純係分享, 大家成年人要為自己嘅決定選擇有所擔當, 大家有不同觀點做法都會唔一樣; 有人選擇西醫西藥, 另類療法或者中藥湯, 我相信都祇係為毛孩著想, 希望為佢哋揀選最適當嘅!
近來網上見多咗過激嘅留言, 即使係善意忠告, 但言詞欠溫和, 睇到標晒汗; 希望大家互相尊重, 有嘢慢慢講, 上得呢D群組, 當然係關心毛孩嘅健康啦!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
