豆b離開咗足5個月喇, 呢段日子以來, 我仍然對佢十分牽掛, 甚至剛兩日前, 仲訂做咗個寶貝紀念肖像牌, 不過到手要再等兩個月啦!
離開咗嘅6個仔女, 我最鍚係叻叻, 但對我最痴纏依戀, 係呢隻傻豬豆啊!
當豆b離開後, 我感覺缺失好大, 無咗一對亮睛睛嘅眼仔時刻望住我, 又無咗我一招手就飛撲過嚟嘅豆豆, 我好失落!
會時時想起豬豆, 間唔中都仲會眼濕濕!
琴日, Ka同豆b聯繫上喇, 佢話豆b喺彩虹橋上過得好好, 好開心; 有隻雀仔守護住佢, 佢依家同一隻叫樂樂嘅松松女女一齊生活; 佢話見到媽媽生活得好好, 佢唔會再返嚟探我哋喇, 佢好輕鬆, 好愉快!
個傻女咁適應新生活就好喇, 一個階段完結咗應該要move on, 佢可以放低前生唔再牽掛係好事, 呢個都係豆b嘅性格; 佢好樂觀, 好識安排, 全情投入活在當下, 從佢同我一齊生活嘅日子我好瞭解, 佢係整個生命付託㗎; 不過, 佢完全唔留戀以往我又有D心酸, 好矛盾啊!
將呢個message passed咗比阿女同S媽媽, 佢哋都問樂樂? 係咪之前我家嘅樂樂女呀?
我有問Ka, 傳樂樂嘅相比佢認吓, 佢話唔肯定, 有D似, 但知道嗰隻都係女女啦!
阿女就話點解樂樂無同叻叻一齊呀?
我睇"永恆的禮物"呢本書, 都有講及有D動物係唔想投胎做人, 亦唔想再返人間, 佢哋見過, 感受到人類嘅生活好複雜, 佢哋覺得天家生活簡簡單單, 就唔想走喇; 可能我家嘅樂樂覺得生活喺天家更開心, 佢無離開, 咁啱就照顧到豬豆啦!
而叻叻, 佢同樂樂相聚咗一段日子, 佢選擇繼續前進去另一個新階段, 可能投胎咗做人喇!
咁去演繹最安心, 一定係咁!
但願我所有嘅寶貝離開後, 都可以自由選擇佢哋想走嘅路, 活得開心, 咁媽媽就安心喇!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
