完全唔識形容今日收到動物診所電話, 聽到內容嗰一刻嘅激動....
琴日帶達達去做body check, 帶咗達達嘅尿尿, 都帶咗波波嘅小便覆驗UPC嘅ratio, 上次嘅報告令我好失望, 我希望今次會變得好!
今日...診所call我, 姑娘話兩隻豬仔驗尿有咗報告, 達達一切正常, 而波波嘅結果....係大有進步😂; 雖然指數仍未達標, 但結果比第一次嘅報告更好, 已經向正常水平又踏前咗一步, 對我係一個極大嘅鼓舞!
上次波波UPC嘅指數暴升, 其實我係心中有數, 洗牙要落麻醉藥係一定有影響, 對佢個腎一定唔好; 其實做嗰次洗牙剝牙要面對太多不利因素, 但見到佢痛到飲水都震晒, 又點可以唔做, 點都要博一舖啦!
不過如果問我有無後悔比佢做, 我肯定講句, "我無"
成日都講住生活要有質素, 生活正常要起碼得到, 最簡單食得瞓得, 如果玩得當然更加好, 去到之前嗰個地步, 係無得唔做!
雖然經過麻醉後, 覆驗UPC有一份差咗成倍嘅報告, 但呢個反而推動咗我唔好再左諗右諗, 一於試用中藥去開一條新路; 網友介紹我搵到整體療法嘅林醫生, 開咗中藥亦試做咗一次reiki, 當晚係胃口好咗同瞓得幾好, 令我覺得靈氣治療都幾好!
一切都要講timing要講緣份, 多謝Ka喺最適當嘅時候, 引薦佢嘅reiki老師, 幫波波搵出身體毛病, 開始用靈氣治療再加上量子共振!
今次有呢個進步, 療程係作出咗相關嘅改動; 呢段期間, 順勢療師有建議新加入兩款remedies, 而我亦用咗一隻新嘅renal supplement, 當然仲有中藥同能量治療, 各種療程輔助, 缺一不可!
早幾日幫波波定訂咗一樽新嘅草藥, 用澳洲嘅herbal都有一段日子喇, 一直都習慣用所有補充品隔一段期間就改變吓, 希望有D新刺激, 成績會更好啦!
今後仍會keep住主力用順勢療劑, 中藥同靈氣治療, 希望下次成績更進一步啦!
後記: V見到波波有進步, 提議我唔好轉呢隻新嘅herbal, 佢話難得見到有improvement, 不作轉變要繼續; 多謝好朋友提醒, 我唔應該咁aggressive, 就繼續跟返之前咁做啦!
 |
| 有非常好嘅feedback |
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
