 |
| 相片連結 |
今日又帶波波去見老師, 老師話波波正骨再做多一次, 自己好好保養住, 應該ok!
波波今日又再乖D, 坐到好定, 好順利做完正骨嘅療程, 係尾段想幫佢做眼仔就兩頭擰; 每次做眼仔佢都唔鍾意, 可能眼仔唔鍾意嗰種熱力!
近來波波已經恢復朝氣, 喺屋企成日跳嚟跳去, 見佢咁精力旺盛, 就諗住帶佢出去等佢跑吓, 應該都有益; 同佢帶住黑超保護眼睛, 有陽光要做好準備, 以為戴住墨鏡佢會閘住閘住, 點知呢隻豬跑到樂極忘形, 跑到勁快完全唔停, 我要係咁追住放鬆拉繩😅!
 |
| video |
可能隻豬仔再無被骨痛折磨, 唔使再就住就住, 感覺被囚禁嘅身體有釋放嘅快意, 已經好耐未試過跑得咁寫意; 我陪住佢跑真係又驚又喜, 怕佢放到咁盡再扯親咪死😅!
從來唔知佢有脊骨內彎嘅問題, 衹知佢有好多骨刺, 亦無想過呢個問題會影響咁大, 更唔知可以利用量子共振去醫理, 今次真係要多謝Ka介紹老師, 當然更要多謝老師咁落力幫隻豬😁!
天氣潮濕, 係骨痛嘅高峯期, 波波咁耐無運動, 我怕佢會肌肉酸痛, 都唔敢掉以輕心以為佢無曬事, 呢兩日要更勤力D, 幫佢哋照紅外缐燈同埋用針灸筆去保養住!
春天雖然對筋骨風濕痛呢類case無好處, 但對萬物係生長豐盛嘅開始, 希望今年都一如以往, 達達毛髮又踏入復甦期!
 |
| 好似係有好咗D喎 |
上星期六作咗個新嘗試, 為兩隻豬做bone broth, 其實一早有聽聞呢個recipe, 對烹調過程都略知一二, 但要煮咁耐真係無咁好氣!
又係多得Ka, 不斷重複提起, 猛叫我做話好容易; 見佢講咗咁多次, 就認真D再做吓research; 的確係好有益健康, 其實又真係唔難處理!
星期六一早起身就開始煮, 一直到晚上差不多煮咗15小時😁, 見到成功做好嘅bone broth, 好快結成 jelly, 好滿意!
好心急比兩隻豬仔試, 少少哋比咗兩茶匙, 兩隻豬勁鍾意👏!
見佢哋九秒九將湯黏光, 仲意猶未盡咁望住, 我決定以後每個星期都為佢哋做一次!
做一次可以放上冰格用足一星期, 見佢哋食得咁歡喜, 唔做係無道理啦😃!
為咗兩個心肝寶貝我真係好勤力, 我都要比個讃自己😜😋!
Link:Bone Broth: The “Soul Food
http://healthypets.mercola.com/sites/healthypets/archive/2013/12/02/pet-bone-broth.aspx
http://hawthornevet.com/wp-content/uploads/2014/12/Bone-Broth-for-Pets.pdf
http://www.dogsnaturallymagazine.com/reasons-your-dog-love-bone-broth/
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
