 |
| 相片連結 |
琴晚晚飯後, 帶波波同達達, 去搵老友記Ka幫兩隻豬仔做reiki喇!
波波表現明顯比之前穩定, 相比起上一次Ka幫佢做治療嘅時候, 佢成日郁嚟郁去坐唔定, 今次有好大分別喇; 我記得我講過, 佢應該唔及達達嘅接收效果咁好!
但今次佢反應明顯有唔同, 可能之前比老師密集咁同佢做治療, 佢已經習慣, 當Ka雙手放喺佢身上, 佢feel到熟悉嘅感覺, 而佢知道做完之後, 佢會舒服, 所以做嘅時候偶有不適, 我係見到佢強忍住喇!
毛孩好簡單, 反應最直接, 唔會黑講成白, 如果唔係佢感覺良好邊有咁順攤, 就如佢仍然係拒絕做雙眼, 或者嗰種熱嘅感覺攻住雙眼好唔慣!
達達好攪笑, 本來一直都好乖, 見到波波做治療, 自己留喺車車度瞓覺, 不過瞓醒等咗咁耐都未輪到佢㗎, 刁蠻公主開始不耐煩, 開始嘈喇!
達達從來都好抗拒比人抱抱錫錫, 佢好男仔性格, 就算摸吓佢都會閙, 上次帶佢見馮醫生都經過一番安撫先安靜, 可惜換咗落姑娘雙手, 一抱住又再嘈吵, 呢個女最憎人掂佢喇; 但係好奇怪, 咁多次Ka抱佢都無閙, 佢可能feel到Ka有能量傳送, 佢鍾意啦; Ka都感覺到佢有用力吸收能量, 呢個女好叻呀, 佢有自己獨特性格, 會得選擇佢想要乜㗎!
最近都有朋友笑我, 話我越來越走火入魔, 用順勢療劑已經唔科學, 依家仲信埋咩靈氣能量, 真係唔好玩啦; 其實世界上有好多另類治療都有好嘅成效, 我哋嘅知識範籌未可以每樣都懂嘛, 如果自己唔識就輕率武斷, 批評所有呢D另類療法都係假, 我唔認同喇; 咁當然, 如果曾遇上騙子比過人呃, 就想信都難, 有戒心都明白嘅; 不過今次係見到有實質數據支持, 亦親眼見到成效, 我信波波係有好轉啦!
其實未做化驗我都見到個分別, 波波係明顯比之前精神有活力, 最重要有返胃口, 毛毛都多咗光澤; 不過無實質嘅數據支持, 自己都總係唔放心, 怕行錯路嘛!
雖然之前因為豆B嘅lab test, 同真實情況有好大偏差, 我曾經好抗拒再同佢哋驗血喇; 不過經過咗一段時間冷靜, 我接受豆b呢種病例情況應該佔小數, 正常情況下, 即使化驗唔會100%準確, 睇個大概總可以吧!
所以我無否定晒傳統醫學, 事實我仍需要西獸醫嘅診斷, 仍需要佢哋嘅儀器做檢查, 致於為毛孩選擇乜嘢治療方法, 就由自己把關, 事實最清楚佢哋身體改變係媽媽, 何妨因應自己毛孩嘅需要, 比自己多一個選擇!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
