 |
| 相片連結 |
今日再帶波波見老師, 繼續靈氣治療!
波波今日好乖, 前所未有咁合作, 即使老師用量子正骨時有拉扯力, 佢都肯坐定; 見佢忍到發出輕微呀呀聲, 都知係惡頂喇, 起碼唔會係享受嘅療程; 可能隻豬已經get到, 即使進行過程有唔舒服, 但每次做完都好輕鬆, 所以佢好叻仔乖乖坐定定😊!
已經做咗6個療程, 各方面都見到進步, 隻豬仔胃口好好, 毛髮顏色鮮明豐潤, 回復正常活動力, 成日扎扎跳😁！
一切轉變都比到我正面鼓舞, 另我更有信心向前邁步, 見今日陽光好好, 見完老師比佢落地小跑步; 見隻豬沐浴喺陽光下輕鬆有如小馬踏步, 我好滿足🙏 !
 |
| 跑到彈吓彈吓 😃 |
想當日Ka叫我比老師幫波波試吓做reiki, 我係好難說服自己, 另類療法之中, 針灸都有枝針見到, 順勢治療又有療劑可服用, 叫做有D實物支持😉; 但reiki只靠一雙手, 仲要可以隔空傳靈氣, 真係太神奇; 再加上自己之前去過嘅入門課, 係完全無感覺囉!
但Ka好熱心, 自己為我兩隻豬傳靈氣, 希望比我見証到reiki嘅效用; 而我對靈氣治療係慢慢接受, 況且林醫生都有同波波做過, 效果算唔錯; 起碼當晚波波係會開胃咗, 可能無密集咁做, 無得到十足效果啦!
既然已經做咗咁多另類治療, 要再加入reiki, 不妨搵個資深嘅專業治療師, 深入D希望可以徹底做好!
有朋友話我就嚟變咗個神婆, 沉迷喺古靈精怪嘅治療, 欺騙自己係有幫助; 佢話通街咁多獸醫, 總唔會無好嘅一個!
我唔介意做神婆, 祇求幫到我, 如果單靠傳統獸醫係幫得到, 我邊會咁無助? 使乜花咁多心力去搵另類療法, 希望有好嘅結果!
當然一定有好獸醫, 我都有遇過, 我依家仍然需要獸醫嘅幫助, 祇係希望多角度去幫波波嗟!
任何治療都應該有一定幫助, 當然係講用嘅方法正確; 中西獸醫各有所長, 唔可以一刀將兩種醫療分割; 但對腎病蛋白尿呢類慢性病, 我感覺中藥更具效果, 不過是否適合個別身體, 真係要小心判斷囉; 波波一向對西藥反應過大, 我覺得中藥較溫和, 都屬意以後比林醫生用中藥跟進波波!
月尾阿女將會跟老師上堂, 有好嘅老師帶領幫助, 希望阿女可以有天份搭通條天線, 靈氣治療日後嘅保養, 希望可以由佢幫波波!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
