 |
| 相片連結 |
天寒地凍要帶隻豬仔出外有擔心㗎, 但要睇醫生無得揀, 繼達達前晚急診後, 今日又急急帶波波去睇眼, 真係壓力大, 自己頭痛到爆, 要食藥頂住啦😖!
做足準備, 氈仔, 暖蛋, 同個仔著住衫, 希望準備充足唔會冷親, 唔好冷病再有麻煩, 天呀求你唔好再比我試煉喇!
熊醫生話波波白內障眼仔影響咗角膜, 今次要試類固醇滴眼, 即使我萬般唔願意, 都無辦法唔屈服啦, 下星期又要覆診, 沒完沒了咁真慘, 咁小心照護都出事, 真係比呢兩隻豬嘅突發症狀打垮晒!
呢個仔底子都係差, 之前嘅狗狗老年時都有過白內障, 行動無麻煩, 亦無發炎萎縮狀況, 更加無咩蛋白流失....等等啦, 波波反應真係比較差😓!
當我每次後悔無幫波波做手術試吓, 阿女就話人家好好, 唔等同波波都得㗎, 可能做咗仲麻煩, 一大堆後遺症跟尾仲慘, 而且麻醉風險無得評估, 有狗狗誘發不停抽筋狀態㗎; 波波底子差, 真係博唔過, 就如之前嘅醫生所講, 非關乎生命危險, 佢無痛苦出現, 手術可免則免喇!
要相信自己, 為佢揀嘅係最好選擇, 唔好再諗返轉頭喇, 即使再揀, 仍然唔敢同佢麻醉手術啦!
我明白嘅, 只係有時會感覺氣餒, 前路似越來越難行😩!
剛踏出眼科診所就接到梁醫生電話, 琴日驗蛋白尿有結果喇, 呢次係停晒西藥一個月後嘅檢測, 結果係好差😓!
今次我有進步, 叫自己唔好急唔好亂, 唔好急急下決定慢慢諗辦法; 呢個報告顯示波波唔可以單靠中藥, 好似兜兜轉轉又返到起步點, 見到佢食得瞓得一切有好轉, 就偏偏嚟個數據比我挫折😭!
星期一覆診睇醫生有乜建議, 或者試吓用最低劑量西藥, 配合中藥保健; 睇吓中西合壁會唔會好轉, 商量吓呢個是否可行嘅預算!
唔想用西藥, 更唔想用類固醇, 但個天就要比我挑戰, 算啦我已經無力作戰, 只要幫到波波, 只要維持到正常生活質素, 就係最好選擇, 我乖乖認命妥協!
達達今日有進步喇, 早午肯正常開餐, 希望之前真係瞓醒一時血糖低, 血氣未運行啦; 我呢個緊張媽媽, 一見D豬有唔妥就心慌喇, 點解經驗越多表現越差😢?
以前養 5寶真係壓力無咁大....
呢幾隻豬真係比較麻煩, 可能細身又基因麻麻, 命中注定比我遇到佢哋 , 祇好盡力去做喇!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
