2018年1月3日星期三

一定做得到 (w/album)

2018年, 算係一個新開始, 波波踏入一個新里程!
終於收齊用料, 幫波波做好咗個bumper ring, 不過老公話仍須改良, 用料未有預期咁好, 依家就比佢當練習, 希望乖仔適應!
我自己亦調較好心情, 接受咗個仔真係失去視力, 唯有努力D幫佢過渡呢個困境, 但願往後嘅日子佢仍可活得開心積極!

要佢一時三刻掌握到, 仲比我好嘅反應, 呢個係無可能嘅事, 尤其波波一向神經質, 面臨咁大嘅變故衝擊, 難怪佢表現忐忑, 我都預咗佢需要一段時間去適應!

我一直擔心佢唔肯用個bumper ring, 跟據過去佢著件衫都唔肯行, 戴個頭罩都定晒形, 我完全唔會意外即使有負面嘅反應!

今晚幫佢試戴, 都預咗佢會驚, 會成晚坐定定, 但波波好叻仔,算接受得好快, 我一直留意住佢嘅表情!

從一開始唔敢郁, 坐到直一直...
到企起身瞪大眼, 緊張兩頭望...
然後行兩步就停, 坐低唔郁, 再鼓起勇氣邁步...
佢有嘗試探索環境, 用行動証明有努力!

當然佢表現好反覆, 坐嘅時候多, 我亦無認為佢可以咁快handle到; 但祇要佢肯嘗試, 再認識呢枝盲公竹, 係可以幫助到, 我有信心佢總會做得到!

希望有朝一日, 波波可以重拾昔日嘅快樂日子, 雖然係睇唔到, 我都可以牽住佢正常跑步; 我都唔知仲有乜嘢可以為個仔做, 唯有比正能量叫佢加油, 祇要信心建立到, 乖仔一定可以做得到 !