 |
| 相片連結 |
兩公婆都係狗奴才命😂!
因為波波矮細, 唔封住梳化腳定唔到位, 個bumper ring好幾次插咗入梳化底, 如果唔快手擋住, 撞親個仔就有排閉翳, 變咗我自己緊張兮兮😅!
未搵到適合物料封梳化底, 琴晚用膠紙暫時頂住, 以為算係權宜之計, 但原來都係廢!
當波波個bumper ring撞向膠紙, 個膠環同膠紙接觸下會啜住, 個環有反彈力彈吓彈吓, 咁又嚇親個仔, 又嚇到佢坐低!
即刻call 老公, 比拍咗嘅片佢睇, 要盡快搵物料先幫到個仔, 萬一再嚇親波波佢唔肯學行, 一切計劃都盡廢; 老公話放工即去睇睇, 估唔到一下就搵到合適物料, 多謝老天爺眷顧個寶貝仔!
整好梳化後又再將bumper ring稍作改良, 加上鐵缐定位, 緩衝拉扯力無咁大, 事關呢個環要陪足佢一世喇, 一定要整到perfect要一個舒服嘅設計!
一切都妥善安排好, 比波波試吓個新設計, 效果我係非常滿意, 波波一定唔會再嚇到坐低 😄!
當然波波仍需努力適應, 我就陪住佢身邊一齊行加以鼓勵, 波波好叻仔, 今日可以自己一個由廳行到入房, 雖然係試咗一次咁多, 但我已經好安慰.
我知道波波一定得, 一定可以重拾信心, 一定可以正常生活, 做返個開心豬仔!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
