 |
| 相片連結 |
琴日喺fb見到一篇po文, 講及狗狗年紀漸大, 遇上天氣冷, 都會時有呢度痛, 嗰度痛, 甚至會經常抽筋; 所有種種話係 寒凝經脈嘅問題, 即係疼痛多數由寒邪引起, 而寒邪嘅致病特點係疼痛遇到寒冷就會加重, 得溫就減輕!
我仲沾沾自喜, 覺得自己都算做到有八成, 自己好明白兩隻豬年紀漸大, 保養方面要多加留意, 亦會將氣温監控住!
自問已經好小心, 琴日朝早仲喺FB出post, 話自己將屋企溫度濕度調較好, 兩隻豬一定唔會冷親, 保養方面都顧及到佢哋要調和血氣!
早上兩隻豬早餐都食得好好哋, 之後比佢哋上床再瞓, 咁凍嘅天氣窩住喺被, 係最寫意!
然後餵午餐, 波波好快食晒, 近來呢隻豬算胃口唔壞, 可能同中藥夾; 達達就有麻煩, 佢唔肯食仲坐低唔行, 我都有D擔心有古怪; 不過一餐半餐叫自己唔好又緊張到騰晒, 可能早餐食得太飽, 比多D時間佢消化!
到臨近晚餐, 慣常叫醒個女去尿尿後開餐, 放佢落地比我好大驚嚇, 佢完全無力搖搖擺擺, 企都企唔穩行都唔識行, 好似就要跌低咁啦, 我即時心都慌晒!
唔敢拖時間, 唔想更夜無選擇, 唔想去 24小時動物醫院, 聽到太多負面comment, 要我帶個女去診症好為難; 即刻call 馮醫生, 希望佢今日有當值可以接case; 姑娘話可以去, 但係急診收費!
9秒9跑落街截的士, 可以由相熟醫生followed返個case, 我好lucky!
 |
| 一唔舒服成個殘晒😩 |
一連串檢查, 馮醫生做得極仔細啦, 心肺清, 淋巴無腫脹, 做埋詳細血檢都搵唔到原因啊; 可能傷風鼻塞感冒啦, 佢猛打乞嚏有鼻水嘛, 又可能剛瞓醒血氣運行差, 年紀大咗有D麻煩, 希望係咁啦, 一定係.....
今日達達已經有好轉, 不過胃口都係麻麻, 只好觀察住喇!
真係厚多士啊😓, 一波未平一波又起, 我就快無力撐!
本來波波二月先覆診眼仔, 唔知做乜今日眼仔又紅曬, 聽日又要見眼科熊醫生, 有白內障眼原來咁煩, 盲咗都未夠慘😭!
抱住波波, 仍然覺得條路幾難行, 都甘願陪住佢行, 只要上天比我哋更多相聚嘅時間!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
