 |
| 相片連結 |
我唔想用synthetic drugs幫助, 我想用自然療法有咩錯? 點解個天要咁玩我?
知道我最錫波波, 就要我咁難過，由BB開始一關一關咁過; 到底我前世有乜嘢做錯? 今世要睇住我最鍚嘅波波受折磨！
今日同波波覆診, 熊醫生話波波眼仔好咗好多, 我都見到佢眼仔清咗, 以為可以暫時告一個段落, 有D安樂日子過, 點知醫生話之前嘅眼藥幫唔到, 要以後長滴類固醇喎😭!
真係唔識點形容, 成個儍咗, 我最怕面對嘅迫住我受落, 波波用親西藥都唔妥, 以為短暫權宜之計, 點知係咁結果, 仲要係類固醇, 好痛心啊!
我可以點? 香港無動物holistic vet, 眼科亦無好多, 我仲可以睇邊個?
傳統西醫都係咁, 因應症狀去落藥, 要遏止情況唔做成更大傷害, 唔會理後遺症有幾多, 又或者明知結果都好無奈, 就正如我...
眼見類固醇係好大幫助, 波波眼仔係好咗, 無紅無渾濁好青爽, 要堅持唔用...我唔敢囉!
之前爆紅, 角膜渾濁, 話過要維持起碼生活質素, 唔滴佢勁唔舒服, 目前唔管去管日後, 好似本末倒置咗, 唉, 要點做啊???????????
醫生話滴落眼唔會傷健康, 一滴咁少可以做成幾大禍害? 波波眼仔發炎控制唔到, 摘眼機會一定高; 雖然明知長滴類固醇後果都唔會好, 一樣會眼壓升高而誘發青光眼, 但未迫到埋身嗰步, 未去到窮途末路, 我只好行呢條路!
眼仔嘅路荊棘滿途, 未來好壞難估計到, 蛋白尿問題換咗中藥, 亦未知是否控制好, 又有可能走回頭路; 但願可以補充少量西藥就好, 但願眼仔再無新嘅issue!
一直辛辛苦苦去做, 物理治療也好, 中藥, 順勢療法, reiki等等, 咁溫和嘅治療對波波呢種咁aggressive嘅病症似乎唔太幫到, 但波波接受唔到嘅偏偏都碰到, 最慘係用西藥佢副作用超高!
任我幾小心照護都無用....好心痛!
豁出去, 要我點做就點做, 擔心都於事無補, 都話咗頭痛醫頭腳痛醫腳, 我已經無嘢可做😥.....
回程比波波落地跑跑, 一齊舒解吓悶氣仲好!
波波出外到熟識嘅地方明顯表現好, 可能地方空曠無咁易有傢具碰撞, 佢識利用嗅覺搵路, 見佢用個鼻仔猛索, 就開始細跑步!
一整日呢個係我最開心嘅時間, 見到波波同以往一樣咁開心兩頭跑, 簡直係最佳解煩惱嘅靈丹!
希望天氣好, 希望唔好再凍, 可以同波波多D出去散步!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
