 |
| 相片連結 |
天氣開始轉冷, 網上見到好多狗狗觸發筋骨痠痛舊患, 我都好驚兩隻豬仔又腰頸病發, 頸腰腳痛都真係好慘; 俗語有講'三十之前人欺病, 三十之後病欺人', 狗狗同人類一樣啦, 年紀大咗小事都容易變大, 要盡量保養住喇, 一旦病咗康復時間要好長嘛!
呢種濕冷嘅天氣好攞命, 呢幾日兩隻豬瞓著都聽到氣管有D聲, 波波仲會咳兩聲😖, 唔太嚴重我會比順勢藥; 當然唔敢偷懶要勤加保養, 幸運嘅係兩隻豬都算合作, 如果唔肯做又要再費周章!
每日都會比波波戴住bumper ring練習認方向, 個仔表現好飄忽, 一時掌握得好好可以通處走, 一時又企定變石像; 我已經改變心態唔心急, 由得佢自然發展唔要佢頂硬上!
開始學習到凡事唔好太執著, 要每事完美根本無咁理想!
今日喺FB睇到一段留言…
'今日係xx嘅生日, 10歲對我來講好百感交集, 感恩上天比我遇到xx陪左我10年, 但同時會憂慮及傷心佢開始步入晚年, 一隻小狗步入雙位數就係同主人倒數時候, 一諗到咁對眼就好似駁咗水喉咁！'
呢段留言我好有同感, 但依家我睇法再唔一樣, 我會更著重每日同佢哋相處嘅時刻, 往後嘅將來唔再多想!
朋友話見到佢哋個樣唔同咗喇, 歲月不饒人, 有生命嘅都一樣; 有邊個可以長生不老? 有邊個可以老咗都keep住年青樣? 眼見自己頭上嘅白頭髪, 狗狗何嘗唔一樣?
見到豬仔面上嘅白毛, 呢個自然老化現象, 只會提醒咗我, 我哋共渡嘅時間有幾長!
無論兩隻豬仔係童顏定係老樣, 佢哋喺我心目中永遠係我最鍾愛嘅寶貝, 媽媽對佢哋嘅愛只會隨著時間年月増長😊！
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
