 |
| 相片連結 |
收到晒 5件涼感衣喇, 今次幫香港嘅網店買, 貨到睇實物質料唔差, 算係有驚喜啦; 呢幾件衫比以前從日本訂購比豆b嗰件彈性仲大, 對於咁抗拒著衫嘅波波束縛唔大, 試上身感覺涼涼咁好舒服, 個仔受落晒👍!
即刻洗乾淨, 瞓覺可以著新衫, 呢D質料濕水都好快乾, 今晚瞓覺時, 唔蓋被都唔使擔心冷氣大喇😄!
當然唔會由早著衫著到晚, 中午就要除下疏通皮毛, 主要都係一早一晚, 或者坐梳化時喺冷氣風口下, 呢個情況達達最需要喇, 呢個女硬要坐梳化, 怕咗佢吹到冷風打乞嚏啦!
 |
| video |
呢輪兩隻豬都上大床瞓, 之前比達達上床已經成習慣, 放佢落網床佢好嘈吵, 嘈到波波都忟晒; 網上睇過話狗狗年紀大咗, 自己感覺同以前分別大, 會欠缺安全感, 所以鍾意同爸媽靠近瞓, 咁的確達達同我哋瞓佢好安靜, 仲瞓得好稔!
之前怕達達抽筋, 理所當然要陪住佢瞓, 理由充份; 但依家又剩低波波自己瞓床仔就太過份, 咁做太偏心; 講到欠缺安全感, 波波眼仔睇唔見應該需求更甚, 要我甩開佢無可能, 之前我已經好不忍, 依家更做唔到要佢自己一個瞓; 波波係我心頭肉, 我點忍心?
於是一家四口迫埋一齊, 兩隻豬好開心, 自己搵位一吓就瞓到稔; 老公嘛唔理天塌落嚟都當被冚, 一於大覺瞓, 祇剩低我半睡半醒😴, 唉, 可憐天下媽媽心!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
