 |
| 相片連結 |
今日午餐, 我如常行過餐檯, 放波波喺另一面有地墊嘅客廳, 叫佢乖乖自己行吓, 媽媽要食晏; 達達就一定要放梳化, 佢會乖乖唔郁坐定定(我都怕有意外佢跌落嚟㗎, 放咗網床嘅墊喺哋下, 跌都無咁傷卦)!
唔依從佢放上去, 佢會放盡氣力兩頭跑, 大聲嗌㗎; 好怕佢咁激動, 怕佢腦仔頂唔順, 又怕佢手腳抽筋會痛痛, 總之買佢怕, 自己仲輕鬆!
無辦法唔縱, 就算瞓到三更半夜, 佢嘈住要上返大床, 我都會讓步, 總之實行放縱, 兩隻豬想要嘅, 唔傷害嘅我哋盡量滿足!
食食吓突然見到波波喺我腳邊郁動, 我真係好意外見到佢有呢個舉動, 波波從來係好有 discipline嘅狗狗, 以前我哋開餐佢會自己返圍欄, 一直等到我哋食完, 佢先會出動過來要我抱!
呢兩年間, 實在有好大變化, 曾經一度佢無晒胃口, 想佢好好咁食一餐都難; 之後到眼仔失明仲慘, 佢無晒自信舉步維艱, 全憑感覺腳仔踏住地墊慢慢行, 偶爾踏出地墊範圍, 佢即轉彎...
今日係咩事, 佢會離開地墊咁夠膽? 仲會咁為食豬望向我㗎?
真係好開心, 原來我開心好簡單, 見到波波識為食我笑晒, 梗係滿足佢口慾啦!
我以前一定唔會助長佢呢種行為, 唔會比佢習慣騷擾我哋開餐, 更唔會我哋食嘢時分佢一杯羹, 但今時今日, 佢哋大晒!
按年齡兌換佢仲比我大, 對高齡長者無必要set咁多規條啦, 我決定放縱我呢兩隻高齡BB, 祇要佢哋開心, 無傷害嘅佢哋所有要求, 我會盡量滿足晒!
 |
| 最鍾意為食豬, 越為食越好😄 |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
