 |
| 相片連結 |
平靜嘅日子睇落好悶, 兩隻豬食飽就瞓覺, 一時兩頭跑嗌吓交; 我就拎住手機猛影, 佢哋一舉一動我都覺得有趣㗎, 我諗呢個係每一個媽媽嘅通病喇; 好enjoy呢種生活, 風起雲湧嘅日子我怕怕!
老公話我日日post呢D相上網, 人哋睇到悶啦, 日日千篇一律嘅背景, 相同嘅狗狗, 連靚靚風景都無得睇吓; 我無考慮其他喎, 純粹自得其樂, 在我來睇, 佢哋每一個表情變化, 都有好大分別, 不過我同意呢D咁微少嘅變化, 真係要自己先察覺喇; 所以在於其他人, 感覺真係張張相都無唔同, 根本無分別啦; 但要唔要睇大家有自由, 反正係有權選擇, 唔想睇可以唔好睇, 唔好按入去嘛😝!
想要100%平靜生活都好難, 往往無意之間, 都會得到某類資訊擾亂自己嘅平淡, 開始感覺知多D嘅弊處, 唔識唔知就唔使多咗擔心啦...
當然都係呻吓, 有個底遇事會比較識選擇, 尤其關乎豬仔嘅身體健康, 更加要自己把關!
琴日睇到有兩個貼文, 好似一盆冷水照頭淋, 雖然係唔開心, 但都慶幸知道個原因; 第一則有關達達, 知道利弊可以即時叫停, 還望可以扭轉乾坤啦; 第二則有關波波..., 知道真相後, 叫自己唔好太天真😰!
琴日見到有網上留言, 話狗狗肝酵素持續升高, 一直都降唔到, 原來有關服用咗青口素, 停服後就回復正常, 真好!
達達關節差, 我比佢嘅joint supplement都有青口成份, 咁可能都有機會導致佢肝酵素降唔到, 希望停服佢嘅關節補充後, 佢會一樣咁幸運!
其實好多年前, V知道波波曾肝酵素高, 佢有提過我唔好比青口餵波波, 不過波波無事之後, 我已經完全忘記咗, 肝臟有問題唔適合食青口...
唉, 係我錯😞!
另有一篇報導, 有眼科醫生講及眼睛白內障係無藥預防, 呢個我就有保留; 雖然專科講嘅力度夠, 但好多眼睛嘅supplement都係經專業醫生研究, 確定可以延緩白內障惡化同產生!
我相信唔多唔少都會有幫助, 可以延緩惡化都已經係功臣!
不過醫生解釋大家用咗supplement 後所謂嘅好轉, 就令我又失望, 又驚又擔心!
然後冷靜落嚟, 叫自己唔好愁, 雖然有呢個risk, 但唔代表一定個個都咁不幸; 熊醫生話好多狗狗持續滴藥六年之久, 都keep得穩定, 無謂搵嘢嚟擔心, 反正要發生嘅都無辦法改變事實!
要學會唔好咩衰嘢都代入, 繼續享受現有嘅平靜開心, 正能量好事就會降臨😄!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
