 |
| 相片連結 |
我努力學習要懷住正向, 接受兩隻豬仔漸漸老去, 身體機能正常會逐漸衰退, 生老病死係自然事, 祇要盡心盡力照顧愛鍚, 就唔會有遺憾; 要珍惜相聚嘅日子, 要相處得開開心心, 我哋曾經共渡嘅每一刻係唔會消失, 喺世界嘅某一處, 會永恆咁留住我哋相愛嘅烙印!
呢段日子以來, 我有作出改變, 避開負面思想, 將快樂無限擴大, 又真係活得比之前開心; 原本世事就難預測, 今朝有酒今朝醉無唔啱, 得快樂時且快樂嘛, 憂慮太多徒添心煩!
我應該都係阿Q精神, 祇係無嘢迫到埋身我唔去諗(其實都有進步㗎, 起碼無搵D嘢出嚟擔心), 我唔係冷靜嘅人, 點會有咁嘅修行😒!
最近我過得咁輕鬆, 應該係兩隻豬仔爭氣, 身體無出事, 我先可以安安樂樂咁過日晨!
但今日發生咗一件事, 就比我睇清楚自己, 我都係改變唔到, 如果佢哋有事, 咩正念去處事, 都拋到九千里!
本來好小事, 老公放工返嚟, 習慣派零食比兩隻豬, 兩隻豬到時到候, 就會向住大門企喺度等住, 我就由得佢哋開心相處; 今日老公比脫水雞肉, 我一向小心, 預早已經剪好晒細細粒放喺盒裡, 確保咁細粒佢哋唔會哽親出事!
但今日竟然會發生意外, 波波竟然吞唔落去....
可能粒雞肉太乾, 黐住咗咽喉唔上唔落, 睇住佢眼仔充血脷仔發黑, 企都企唔穩, 我快嚇暈!
本來咁細粒唔應該影響到佢呼吸, 但佢一緊張可能氣管收窄, 我扣喉倒吊拍打都無幫助, 餵水佢又唔識吞, 真係嚇死人; 老公叫我再用針筒慢慢泵, 希望濕潤返就可以吞!
初時佢都係唔識吞, 我已經驚到手都震, 咁情況飛去醫院急救都無可能, 根本無時間, 窒息點經得起路途遙遠嘅折騰?
唯有強自鎮定逐少逐少泵, 掃吓喉嚨叫個仔唔使擔心, 呢個緊張豬仔再咁驚青又點識吞...
多謝老天憐憫, 波波最後成功吞到落去, 見佢眼仔再無紅脷仔又唔黑, 仲識兩頭轉跟住企返起身!
真係唔識形容嗰一刻, 感覺自己頭重腳輕又頭暈, 再三確認佢正常無事識兩頭行, 我即衝入廁所狂喊; 原來面對將失去係咁可怕, 他日要面對呢一刻都應該唔會有咩正能量啦, 明白大道理唔難, 但並唔等同可以接受啊!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
