Happy New Year, 祝願大家隨住新嘅一年, 一切有好嘅改善, 但願可以天從人願!
我嘅願望都係維持不變,只願一家平安健康!
祝願波波眼仔有進展, 達達抽筋唔再嚟, 豆b頸椎keep住無事!
兩年前嘅一月份, 我呢個blog出過一篇post, 題目係"最關心嘅兩件事" , 兩年後嘅一月, 我竟然面對住同樣嘅問題, 不單有一模一樣嘅"最關心嘅兩件事", 仲要加上波波呢件, 真係諷刺!
兩年前舊工人姐姐同我完結僱傭關係, 面對住再接受新工人問題; 達達毛毛轉差, 又再甩毛甩髻; 今日都係面對住相同問題, 但情況仲弊, 達達抽筋都出埋嚟, 波波仲整傷埋眼仔，真係應驗咗呢句"沒有最差, 只有更差"嘅預計!
原來達達一個循環都好慢, 喺兩年裡面慢慢變差, 如果佢仍有能力往上爬, 我就無有怕; 但年紀越大機能越差, 呢個係正比例, 依家仲開始有抽筋, 結果係點都可以大概估計!
都係咁啦, 盡能力照顧佢, 陪住佢fight!
 |
| 頸背嘅毛先變黑, 慢慢疏落 :( |
睇番兩年前對舊姐姐嘅評價, 都係嗰類評語啦, 大意、黑面、唔跟指示, 太有自己意見 ; 但相比起呢個姐姐, 都仲係較有可取, 起碼我哋有共識唔再續約, 佢有比足夠時間我搵新姐姐; 係較有責任感, 算好嚟好去!
而呢個姐姐, 有齊上述嘅缺點, 仲不時挑戰我底線; 諗起兩年來佢做嘢都唔覺有大進步, 咁耐都學唔識熨一條西褲, 次次都熨出兩條骨嚟; 但佢仲對答如流, 話自己以前從來唔需要用熨斗, 自有人幫佢熨衫; 原來我唔係請工人, 係請咗個公主!
但我一直待佢不薄, 又忍又教, 每日朝夕相對, 點會無投放感情? 佢雖然越做越差, 但我無忘記有一段時間大家真係曾經努力!
佢係做嘢唔積極, 但個性唔係極差勁, 我總覺得如果無人教佢, 佢唔會咁衰, 不過都可能係自己唔識睇!
我真係錯, 為咗怕新工人越請越差就忍氣吞聲, 為咗怕從頭再教係我懶惰, 今次續咗約都終止關係, 可能係老天幫我做決定!
 |
| 曾經共渡過開心嘅日子! |
新嘅一年, 面臨更多挑戰, 達達情況可否有改善? 對twins健康又會點?
新工人姐姐會帶嚟乜嘢改變? 我唔會天真奢望, 將來嘅新姐姐會任勞任怨, 只求可以做事達標, 唔會事事謀算!
 |
| 提早幾日影嘅新年相, 點諗到會變咗單眼豬! |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
