 |
| 又要修剪毛毛喇! |
呢3隻寶貝豬實在太多事, 湊到我好吃力, 養呢類小型狗狗較正常size要費更多心力, 無庸置疑; 就如我早日帶達達求醫, 葉醫生都叫我唔好嚇親佢, 行雷閃電要照顧佢多D, 呢類小型狗狗太驚會引起腦炎, 你話死味? 咁攪法我仲驚過佢!
當然湊得咁辛苦, 其中一個因素係我自己太緊張, 觀察力"太"強 :(
V話如果每個毛孩家長好似我咁觀察入微, 咁毛孩就少咗機會拖遲診病, 唔會去到嚴重攪到藥石無靈喇; A就話我太集中喺佢哋身上, 有小問題都擴大嚟睇, 唔衰嗰樣都唔代入情況, 攪到自己壓力大到非常!
如果我可以減低50%, 咁就太理想喇; 如果.....一切都可以自由操控, 就唔會成日聽到肥人想瘦, 瘦人想增磅, 正常嘅要keep個體重都咁難有理想 :')
我都唔知從幾時開始, 養狗狗養到咁樣, 追溯番應該係從前照顧叻叻嗰段日子, 嚇到我好驚!
但講番轉頭如果呢3隻豬健健康康, 無事無幹, 我何須咁狼忙? 我發覺養佢哋我安樂嘅日子好少啊!
佢哋身體多多毛病, 又遇上我超級緊張, 注定咁攞命!
有人會依賴信仰, 做祈禱來求心安, 有人信佛上香, 但求諸天神佛幫忙, 我一直都係無任何宗教信仰, 每有難題, 只可望向天上浮雲, 求上天比我力量, 勇敢去闖!
有咗呢3隻多事豬, 開始依賴吉祥物, 但求心之所安啦, 時刻希望佢哋身體健康, 唔好三朝兩日將我嚇到快有心臟病!
最近有人從日本神社求咗寵物長壽符, 今次有幸可以認購到, 上次我買唔到啊!
琴日收到件喇, 個長壽符好靚好精緻, 但呢個唔係重點, 我但求可保佑3隻豬平平安安, 內中所含意義深長!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
