3隻豬真係好耐無浸浴喇, 有接近一個月, 但都無辦法啦; 波波整傷眼, 有傷口點敢攪, 萬一彈咗水落眼, 情況可以好壞, 見到依家都算OK, 上次覆診確認咗傷口好番,淨係眼仔仲有個白色嘅scar, 醫生話要等幾個月先會散; 雖然話無傷口, 但我都係小心D啦, 唔敢整濕佢面仔, 個頭仔都係用濕毛巾抹吓!
浸微泡好處係唔用shampoo都OK, 毛毛一樣清爽蓬鬆, 咁樣控制唔濕面較有把握!
豆b咁耐唔沖涼開始週身挍, 其實係應該要同佢浸浴喇, 但之前咁多事煩, 又擔心波波眼仔, 又擔心達達, 工人姐姐又走咗, 自己做到無停手嘛, 邊有心情吖!
琴日忍無可忍喇, 除咗要沖涼都要修吓毛毛啦, 成隻乞兒仔咁喇; 同對twins沖涼剪毛, 跟住仲要清理番個洗手間, 好慘!
今次兩隻豬都好懶, 全程唔肯企定, 係都要死蛇咁爬低, 攪到我好麻煩, 一隻手托腰得番一隻手去剪, 真係靚極有限 :(
都係唔敢同達達沖涼, 雖然醫生話係結構問題無得攪, 但見佢乞嗤咁頻密, 仲有鼻水, 都擔心㗎; 今日食嘢仲唔係好開胃要人手餵, 呢樣最驚, 希望聽日唔會再係咁啦; 咁情況點敢比佢濕身, 睇定D先算喇!
仍然每日用霧化器幫佢舒緩, 每日3次唔敢懶!
希望達達唔會一直係咁啦, 見佢咁都好辛苦, 真係心痛啊!
 |
| 鼻水濕濕真慘! |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
