工人姐姐走咗真係忙到一頭煙, 其實家務係好簡便, 屋企人少; 但一切要自己做番, 始終唔慣, 尤其接手後搵到姐姐做到污糟棘躂, 真係過唔到自己嗰關!
淨係執佢間房, 猛咁抹抹抹, 就做到我要死喇; 我諗佢之前清潔應該只係做表面, 祇做一眼望見嗰D地方, 自己個房佢懶理喇!
真係嚇死人, 窗台位D麈多到好似廢置嘅居所, 最離譜係佢自己每晚瞓嘅床鋪都唔整理嘛, 我用咁多工人最懶可算係呢位喇; 其他姐姐點懶, 都唔會連自己瞓覺嘅地方都攪到四圍垃圾!
將所有比工人姐姐用嘅床鋪掉晒, 咁核突唔想放入我洗衣機啦, 亦唔想比下個姐姐用, 寧願買過曬!
但我人忙唔係重點, 最慘係個心都要忙埋 :( 擔心啊!
波波眼仔康復進度唔錯, 只係個衰豬會卒眼, 我唔敢除頭罩!
為咗可以比佢舒服D, 我改番用個輕D嘅頸圈, 主要係等佢手仔掂唔到隻眼; 因為傷口已癒合, 佢無再猛擦, 用呢個頸圈擋一擋, 等佢無咁方便攪隻眼仔係OK啦!
以為可以鬆一口氣, 唉! 點知又到達達!
基夲上兩個女都有鼻敏感, 敏感呢樣嘢係無得攪, 大部份時間都見佢鼻仔旁邊嘅毛毛係濕㗎, 當然都會打乞嗤啦; 呢兩日見佢猛打乞嗤, 已經即刻用順勢療法, 平常輕微嘅症狀係可以緩解嘅, 但今次好似唔得啊!
琴晚感覺佢有鼻塞, 可能呼吸唔順啦, 佢又用雙手將枕頭猛抓!
一見佢咁我就驚喇, 咁激動好怕又抽筋啦, 即刻抱起佢然後比佢聞氣喇!
見到佢聞氣時鼻仔郁吓郁吓, 應該係幫到佢啦, 聞完氣佢可以瞓到覺!
為安全計都係要比醫生望吓, 順勢藥只可第一時間試用, 夾到當然好啦, 唔得就唔好拖喇!
Am嘅狗狗出事, 對我做判斷影響好大, 心理有壓力啦; 諗起佢嘅狗狗最初都只係傷風, 點諗到不足一個月會死㗎!
我又開始胡思亂想, 對號入座病發, 都係盡快見醫生啦!
今次都係睇葉醫生, 好開心依家有多一個選擇, 萬一H醫生唔得閒, 都無咁徬徨喇; 所以今次專程帶達達去比葉醫生見吓!
我將我嘅憂慮講清楚, 葉醫生就好小心測試達達, 佢話達達兩邊鼻仔都通嘅, 無鼻塞啦; 經過一輪檢查, 結果發覺係上面嘅犬齒鬆咗, 郁郁吓刺激咗個鼻仔, 有可能D口水上咗去上面, 做成佢猛打乞嚏啊; 呢D係結構上嘅問題, 如果要同達達剝牙好大件事, 唔好博喇; 佢話達達口腔都乾凈, 已經甩咗牙仔嘅牙肉都自我修補良好, 口仔無臭味, 牙仔都唔算多牙石啊!
所以唔使擔心, 見佢鼻仔唔舒服最好就比佢聞氣, 咁就幫到佢喇!
 |
| 隻惡女一入到去震晒, 呢度唔熟地頭啦! |
跟住叫我比3隻豬用潔齒水, 等佢哋口腔無細菌就OK啦!
呢隻潔齒水comment唔錯嘅, 都係天然產品, 又試吓啦!
其實葉醫生都好叻, 可以睇到達達嘅牙仔, 呢隻老虎仔惡到死㗎!
睇完醫生個心就安樂喇, 又繼續忙清潔家居啦, 見唔到就好少理嗟, 比我見到咁污糟而唔做, 真係唔得啦!
http://www.healthymouth.com/Articles.asp?ID=288
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
