 |
| 拉開少少窗簾先影到, 成日瞓! |
呢幾日都持續將波波放喺陰暗嘅房間, 不分晝夜都係黑沉沉, 阿女話一踏入我房就想瞓 :)
波波仍然單眼, 感覺係有好轉但好似好慢, 約咗聽日覆診, 睇睇情況有無必要轉眼科啦; 見佢係咁瞓, 都有D擔心, 希望係好似阿女咁講, 覺得環境昏暗最好就係瞓!
 |
| 真係黑沉沉㗎! |
咁都係嘅, 兩個女一齊入房都係瞓, 開咗音樂調較好室溫, 房間只開一盞小燈, 黑沉沉真係最好係瞓!
佢哋開始年紀大, 係需要多D休息, 瞓多D都無壞!
關於達達疑似抽筋, 呢幾日我不停咁諗, 想搵出誘因!
因為上網搵料, 有過來人分享佢狗狗病發模式, 佢嘅狗狗每次病發都係太興奮, 佢話搵出呢個pattern避免再犯, 見狗狗有興奮即刻抱住安撫, 就無再發作喇!
佢話徵詢過獸醫, 一般病發唔頻密都係觀察, 食藥遺害仲大!
諗番轉頭一年前達達都有過咁情況, 都係熟睡後突發咁抽筋, 但又同真正嘅抽筋有D分別, 佢只係突然好驚咁坐起身, 全身僵硬縮起前手, 無抽搐無失知覺㗎!
今次情況同上次大致相同, 都係熟睡後突然發作, 上次我未瞓見咁及時安撫, 佢無跌側; 今次係半夜時份, 我瞓咗覺, 聽到佢發出聲音仲猛抓枕頭, 都未知係咩原因佢就跌側; 但同樣係個樣受驚嚇, 縮起前手身體僵硬, 無抽搐無失知覺啦; 一樣係經過安撫好快放鬆番!
如果係佢惡夢嚇親我無得避㗎, 不過盡可能都要環境管理令佢calm down!
仲有一個星期工人姐姐姐就走喇, 越嚟越覺得大家唔夾!
琴日整爛第4部攪拌機, 都真係唔明佢點用㗎; 佢個心已經飛走咗, 琴日煲老黃瓜湯, 叫佢連皮煲, 佢竟然連瓜瓤都唔刮, 好彩呢D唔會食壞!
唔通所有嘅一切一切都真係由上天安排? 好彩係佢反口話取消張新約咋, 又好彩今次我無心軟答應佢要求, 即使未揾到新工人姐姐情況下, 都無答應比佢再留下, 唔係一定要貼多一個月人工送佢走啦, 點有可能再忍兩年呀!
一般工人完約在即, 正常點都有D不捨嘅感覺嘛, 即使做事有不當, 大都格外容忍, 再一齊相處嘅時間唔多嘛; 兩年來日夕相對, 見佢仲多過見老公啦, 但今次我每日都慶幸上天幫我做咗正確嘅抉擇!
佢媽媽應該已經幫佢揾到新僱主喇, 見佢態度囂張都估到啦, 又可能人夾人, 祝佢下任僱主好運, 個蜜月期長D啦!
琴日喺群組見有僱主慨嘆, 依家仲有好多未請過工主嘅人, 深信多無良僱主去欺壓呢D離鄉別井打工嘅小女人, 事實時而勢易, 做僱主已經變咗弱勢社群, 無工會撐, 無論邊方面有唔著, 一定係僱主蝕硬, 如果忍唔到要炒, 又機票又補代通知金, 再加上搵新工人嗰筆, 坐底又唔見近兩萬, 真係揼心!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
