 |
| 今日算大躍進, 眼仔有睜大一陣 |
波波眼仔受傷後一直單眼, 睇咗醫生後, 明明感覺佢有好轉, 無叫痛亦無膿狀分泌, 但佢都係單住眼唔打開, 有D擔心究竟乜事!
打電話到診所將情況話比姑娘知, 請佢問問醫生咁多日唔打開眼怕唔怕會有事?
姑娘覆電話轉述醫生叫早兩日返去覆診, 唔好等一星期喇, 早D做個檢查睇睇情況有無變異!
今日帶隻豬覆診喇, 有D緊張, 雖然睇到明顯有好轉, 但肉眼唔係放大鏡, 唔敢肯定!
醫生幫波波滴螢光劑, 睇清楚潰瘍情況, 話我知破洞已自我修補, 眼仔上仲有嘅一層白膜, 就要多D時間先會隱退!
要繼續戴頭罩, 再滴一星期眼藥水, 希望康復順利!
聽到醫生咁講先較安心, 呢幾日見佢單住隻眼都好擔心, 戴住頭罩佢無晒心機, 係咁瞓到昏昏沉沉 :(
對佢嚟講個頭罩都有一定重量, 佢一直都就住要側頭又側身, 戴住咁耐又驚做成佢頸仔有負擔, 肌肉勞損又引起頸痛就麻煩!
本來想除低頭罩等佢唞一陣, 但一除佢就想將眼仔擦埋我身, 真係唔敢!
唉, 總係有牽掛, 無奈!
今日喺診所遇到隻松松, 不過我識佢, 佢就唔識我喇 :)
每日上FB都會睇睇呢個松松天地, 但我好少留言, 只係自己養松松, 總對松松嘅一切關心D, 所以呢度有關嘅趣事, 唔開心嘅事都知一D!
呢隻松松我有印像, 近來佢出post話脚仔痛, 但原來佢都係同達達一樣毛髮有變異; 見佢都係熊仔樣, 唔通毛髮變異係有個族譜, 呢類熊仔樣好似佔大多數, 可能呢種樣嘅松松基因有D唔同!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
