琴晚半夜兩點幾, 達達又打乞嗤, 一整日都無事, 係都要半夜三更嚟整鬼你 :(
唯有從床仔抱佢岀嚟比佢聞氣, 抱住佢聞氣5分鐘佢完全無乞嗤, 亦無張開口仔呼吸, 一切正常!
咁聞完氣我放返佢落床, 以為無事, 但一轉眼就聴到佢呻鼻!
呢種唔同之前佢控制唔到嘅乞嗤, 係一下一下好用力咁呻鼻, 完全唔停止!
咁情況下我點瞓覺? 又跳落床望吓佢啦!
呢隻豬好曳呀, 見到我就無曬聲氣, 我一轉身佢又再嚟; 佢一定知道我係緊張佢打噴嚏呻鼻仔, 要上我床瞓覺就扭計!
呢個女超級聰明, 佢知道就算佢丫丫咁叫, 我都未必一定會縱佢嘛, 但佢係咁呻個鼻仔, 我就驚佢呻傷個鼻膜啦, 咁都無佢符, 死死氣抱佢上床瞓我側邊, 買佢怕!
呢隻豬真係曳曳, 上咗大床就無曬事, 仲好快瞓咗覺 :\從前每事都忍讓嘅達逹, 依家一不如意就會發脾氣閙鬼, 以前從來無要求, 依家就萬事都要做到佢合意先作罷, 甚至古惑到識用詭計去達到目的, 點解呢隻豬性格變得咁曳?!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
