 |
| 一見個袋搶住入去, 未知死啦 ;) |
今日3隻豬去驗血, 一早6點起身準備, 要配合驗甲狀腺素需要服藥後4-6小時, 早餐餵藥要比平時早D!
我以為自己已經可以放鬆, 畢竟係routine check up, 唔係身體有特別事; 但都係一早就肚瀉, 即係我情緒緊張又反射落身體, 已經唔可以自持 :(
唉, 點解唔可以放鬆? 例行檢查都咁緊張, 點面對如果真係有事?
唯有故作輕鬆, 我嘅擔心希望3隻豬唔注意, 我唔想我緊張情緒影響咗佢哋!
還好佢哋一早掛住食早餐, 可以將注意力分散, 食完早飯放返佢哋入房瞓覺, 我就同老公出去飲早茶, 出去逛逛可以將緊張舒緩一下!
然後就要打點吓, 檢查好一切裝備, 好似皇帝出巡咁啦, 去嘅時候尚早, 應該唔會太熱, 但回程正值中午時候, 咁熱就怕怕啦; 做得嘅都盡量做好, 希望唔會熱親3隻寶貝啦!
好喇, 入袋出發 ;)
 |
| 咁開心, 以為去公園呀? |
我一向守時, 到達診所一定唔會遲!
以為豆b抽血最容易, 就比佢當先鋒做開始, 印象中佢係會大聲嗌, 但唔會縮嚟縮去咁難攪, 而且今日我帶備零食, 應付呢隻為食豬應該無麻煩!
可惜今次佢極唔合作, 大力掙扎, 4隻脚仔都吉晒, 都未夠血量驗個blood profile, 只可以驗到個甲狀腺素同全血細胞 :(
無得勉強, 佢已經脷仔黑晒, 作罷!
第二位係達達, Dr. Hsiang話最有信心就係幫佢抽血喇; 通常達達鬧完人一餐, 就會乖乖唔郁喇; 可惜今次都係唔成功, 都係做唔到個blood profile, 同豆b一樣, 只係做到甲狀腺同全血細胞檢查!
我真係心都實晒, 我係知佢哋越嚟越抗拒驗血, 但年紀漸大, 做個body check較心安啦, 不過都唔想太勉強將佢哋嚇得咁慘!
反正無咩特別表現覺得佢哋有唔妥, 就咁算喇!
最後到波波喇, 我將佢放到最後就係知佢最麻煩, 唔想一開始影響Dr. Hsiang嘅心情嘛; 未抽血前放佢落地等醫生評估吓佢側身嘅問題啦!
呢個仔成日同我玩, 今日完全正常晒, Dr. Hsiang話無明顯病徵唔好亂估亂食藥啦, 可能都真係骨刺曾經令佢痛, 下意識就住吓!
然後就開始抽血喇, 我已經打定輸數, 呢個仔唔會順利啦!
呢輪波波食咗好多順勢療劑, 我想知對佢肝腎有無影響嘛!
真係世事無絕對, 佢竟然係唯一嘅一個可以夠血做到個blood profile :)
等報告期間, 開始幫3隻豬身體檢查, 全身按壓摸淋巴, 我最關心嘅心肺正常無事, 關節亦無更差, 一般狀態都算合格喇!
當然波波牙仔有牙石係差, 但我唔麻醉洗牙, 無嘢可做喇, 氣管都聽到有小問題啦!
達達甩咗好多牙仔喇, 但Dr. Hsiang話小型狗狗唔需要用牙去撕開食物, 與其係有牙石細菌, 甩咗好過喇; 鼻水問題無得攪, 但無鼻塞呼吸正常OK啦!
豆b嘛, 氣管極差, 一緊張就脷仔黑晒, 呢樣極麻煩; 一定要keep住令佢calm down, 氣管收窄有生命危險嘛, 呢樣我一直都明白!
所有驗血報告出咗喇, 全部合格過關, 除咗波波再次係BUN稍高, 可能食肉量又要減喇, 不過好開心佢肝腎嘅數值好正常:)
都係我問題, 慌死佢哋唔夠營養, 加多咗少少份量, 都係我唔啱; 不過呢個唔係好大問題, 我唔係第一次面對, 而今次數值只稍微偏高, 我有信心調較返!
美中不足係兩個女做唔到個blood profile, 但佢哋臨床表現正常, Dr. Hsiang話唔好搵嘢嚟擔心喇 :)
 |
| 走喇, 一年後再見啦！ |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
