 |
| 相片連結 |
日日新鮮, 比個仔玩死!
今朝一早起身, 梗係第一時間為3隻豬準備早餐, 然後放佢哋去尿尿, 習慣咗有晒秩序喇; 波波去完廁所表現好奇怪, 急急跑返入圍欄, 我即入廁所睇睇, 又無咩特別!
如常比3隻豬食早餐, 兩個女好落力食得好快, 但波波又唔食喇.....有麻煩!
點解唔食又坐定定唔郁? 又有邊處唔妥啊?
行過去同佢檢查吓, 正常按壓, 無叫無縮即係無痛啦, 檢查到pat pat位, 大件事喇, 佢原來屙潺, 漿住晒個pat pat, 我暈喇!
唔怪得唔食啦, 肚仔有唔舒服嘛, 唔郁....咁漿住晒自己又整唔甩, 好慘!
快快手抱佢入洗手間同佢洗pat pat, 唔敢沖涼, 洗完pat pat用熱毛巾抹身算喇, 吹乾毛毛比佢食藥, 然後瞓覺!
叫姐姐快手家居清潔, steam圍欄, 換晒佢哋床鋪拎去洗晒!
休息咗幾個鐘, 試下吓比佢食一茶羹雞肉, 今次食得好快; 及時食咗兩次順勢療劑, 好彩無做成大問題, 今日一於少食多餐, 一羹羹咁餵, 慢慢調節番腸胃!
之前訂咗幾樣嘢比3隻豬仔, 今日收齊, 買咗兩條phiten磁性手帶比兩隻豬女, 咁3隻豬都有齊晒, 希望真係有D效用, 唔會咁密痛痛, 幫到幾多都無所謂喇!
另外買咗張兩set餐墊, 一set係美国DEXAS品牌, 但外觀竟然無另一set咁靚, 意外驚喜; 嗰款餐墊底面圖案都好靚, 我超鍾意; 不過質量原料, 可能DEXAS會好D!
買呢類產品我會留意原料有無毒素, 有無難聞氣味, 係安全問題; 不過唔直接用嚟盛載食物, 又唔會加熱, 應該OK!
以後3隻豬唔怕食到一天一地, 又唔怕跣腳, 會食得安樂D!
最後仲有張瑜伽墊, 等3隻豬行得無咁用力, 真係要正視佢哋關節問題; 已經有膝關節移位, 再唔好好保護, 遲早會出更嚴重問題, 3隻豬同手術絕緣, 再差好驚會跛 :(
達達豬對一切新事物都唔like, 觀望咗好耐都唔敢行過嚟, 豆b就示範行比佢睇, 見到佢哋好似好有默契 :)
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
