 |
| 相片連結 |
星期日工人姐姐放假, 可以好好享受片刻寧靜!
一早起身服侍3隻豬食早餐, 做好晒善後工作, 3隻豬仔都方便完就齊齊入房, 諗住可以安心再瞓一陣; 雖然平日我都係一樣等佢哋食完就帶佢哋返入房間, 再瞓瞓; 但平日姐姐喺廳度清潔緊, 咁嘈又點可能有得瞓?
呢3隻豬真係曳到激死人, 係都唔肯比我靜靜哋瞓多陣, 放咗落圍欄床仔落晒蚊帳, 都係咁兩頭騰, 達達仲要好似個喇叭手咁, 吖吖吖咁叫到好有節奏感!
算啦唯有起身, 陪3隻豬玩一陣, 每次我都要先攪起個氣氛, 唔係放佢哋出去都係各自搵地方瞓, 整醒我然後就自己去瞓, 係咪想激死人吖!
睇咗'老犬指南'話狗狗唔可以成日瞓, 咁會提早有老犬癡呆症, 腦退化等等, 反正都起咗身, 就陪佢哋攪個氣氛啦, 玩開咗頭要佢哋停落嚟佢哋都唔肯 :)
對twins一向都玩得激進, 跑來跑去推推撞撞, 豆b緊隨住波波, 係咁迫進; 而波波就一直逗住達達, 豆b好無癮; 達達呢, 正努力習慣喺地墊行嚟跑去, 比波波纏住就惡到要殺死人 :D
一整日就睇住呢3隻豬推嚟推去, 然後, 波波同豆b玩到夠晒, 要瞓覺叉電; 反而達達豬, 仲眼仔睩睩行嚟行去, 唔知幾開心 :)
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
