都有好一段時間, 波波唔知係咩原因, 令佢行動有障礙, 睇過幾個醫生都無一個確實答案; 究竟係牙齒鬆脫令佢唔舒服? 定係耳水不平衡導致佢側身? 還是係神經線問題? 膝關節移位? 頸腰骨刺? 肌肉繃緊?
其實上述咁多症狀, 都可以導致佢側身, 但自從佢出現埋行動失平衡, 仲會發出不適嘅聲音, 我確定佢係有痛感!
從舒緩疼痛呢個方向走, 用呢條line嘅順勢療劑, 加上紅外線照射, 無針針灸法, 咩板斧都出齊, 呢幾日好似好D喇 - 要學吓D八卦嘢喇, 3隻豬小氣, 每次話好返都快快又出事, 怕咗佢哋喇 ;)
喺波波唔舒服期間, 到處搵料, 見到好多人話醫生近來推介用青口素, 取代原來嘅關節補充品, 話更易為身體吸收, 咁我就諗起某年去寵物展曾經拎過一小包 sample嘅青口素, 記憶好清楚單張嘅介紹, 強調係食物唔係藥物, 咁從食物補充當然唔使擔心!
早前去寵物展我都有意購買呢隻補充品, 無奈買唔到, 呢隻產品又唔係通處有售, 有D麻煩, 多謝A今日幫我買咗返嚟, 3隻豬可以加料喇!
按一貫我嘅做法, 每隔一段時間我都會轉換吓3隻豬仔嘅supplement, 但有關腰椎, 關節嘅補充品今次我唔換喇, 因為我已經為3隻豬千挑萬選咁去揀, 喺未確定有更適合之選我唔敢輕舉莽動!
但我會每日將青口素當為調味品, 加少少落佢哋嘅食物, 等佢哋關節肌肉多D補給, 又增加食物適口感, 食得更開心!
之前嘅介紹, 有興趣可以喺呢度睇番!
http://yippompom.blogspot.hk/2012/07/blog-post_3661.html
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
