 |
| 豆豆燈 |
豆b走咗之後真係好唔習慣, 平時我行一步佢跟一步, 我永遠唔敢行大步, 要顧慮踢到旁邊嘅豬豆, 要好小心舉步; 習慣每起步都會往腳旁望吓, 依家再見唔到豬豆喇😞😢
達達公主好高竇, 只鍾意坐梳化陪老公睇電視, 即使無人陪伴都唔礙事, 佢祇要高人一等, 比佢自己坐梳化享受就得!
祗有豆b, 係真正希罕媽媽, 常在我左右留意等候; 祗要我隨時向佢招手, 立即投懷送抱, 媽媽又攬又鍚佢最享受!
無咗呢隻黏人嘅豬豆, 真係好唔習慣好難受😢!
S媽媽叫我做一盞燈, 可以做豬豆, 用豆b嘅側面做個剪影掛牆燈!
不過就要師傅幫幫手, 原來影過咁多相, 豆b唯一得呢張側面相, 清晰度見得吓人; 但幾年前頭部嘅輪廓同後期有出入, 最明顯係個額頭, 頭毛長咗輪廓變深!
我要用兩張相片合併, 希望做到後期嘅豆豆!
師傅有幫我畫圖, 當然專業畫圖係高質素, 但豆b頭部嘅輪廓, 即使有些微出入, 我察覺到都係難接受, 呢D係媽媽嘅堅持我唔想去煩人😉!
最後我決定自己畫前半身, 同師傅合作完成張圖, 呢個牆燈今日做好喇, 裁做得非常細緻優質!
將豆豆牆燈掛喺書枱前面嘅牆上, 我覺得呢個位置最適合!
以往我坐喺書枱前用電腦嘅時候, 豆b總係坐喺我腳邊陪住我, 依家豆b就用另一個形式, 繼續每日相伴, 每晚用佢嘅熱同光 - 暖暖照亮我嘅心 :)
