換咗個cover photo, 小豆b在天家會守護細佬同達達, 希望佢哋可以身體健康, 好好陪耐D媽媽!
波波胃口麻麻, 最後都係決定唔再逃避, 搵出個原因先可以諗對策!
決定搵葉醫生, 豆b之前病情似乎佢斷症最到家, 可惜, 當我電話預約時, 佢已經返回台灣老家, 再無喺香港執業喇!
真係晴天霹靂, 將我嘅計劃打亂晒😰!
我應該帶波波去邊度睇醫生? 之前嘅醫生因為種種原因, 我覺得唔太適合, 唔想再睇喇; 狗友推介咗一個好醫生, 而睇過呢個醫生開業時寫嘅一篇文字, 好感動, 我就係希望遇到一個咁有heart嘅醫生; 再上網搵料, 睇到有褒有貶, 不過各人遭遇唔同, 會有唔同評價, 公平D我自己去見識吓, 睇睇呢位L醫生會係各人口中嘅有耐性, 細心, 同有愛心; 還是有其他人講嘅揀症睇, 細過一歲又話多菌唔睇, 流浪動物又唔睇, 無醫德超巴閉啦!
booking 時候係講波波唔開胃, 想做個body check睇睇有乜問題!
琴日準時到達, 感覺係姑娘態度正常, 我無見到有人形容為"差", 但亦唔係熱情澎湃, 總之係OK, 無hard feeling, 好正常啦!
入到診症室, 知道係做body check, 醫生頗詳細檢查, 認真聽心肺, 敲肚仔, check眼仔...., 比我感覺係有心機睇, 佢會聽心時較好timer, 重覆聽兩, 三次, 頗細心!
網友話佢睇心臟到家, 可能係咁佢最著重呢環!
手觸聽診佢唔覺波波有病, 問點解要做身體檢查, 仲要求照埋超聲波, xray 呀?
一心以為比詳細家族史對診斷有幫助, 人睇醫生都會問及有無家族遺傳病, 會小心往特定方向做檢查嘛!
所以我講咗豆b嘅情況, 話驚波波基因接近, 做個詳細檢查較放心!
醫生認為無必要, 當我堅持要驗開始玩變臉, 態度急劇轉變, 我從未遇過呢種醫生!
以下醫生講嘅我無加任何枝葉, 但好老實, 我極唔開心😞!
"無任何病徵唔需要驗血, 超聲波更無必要"
咁咩叫身體檢查? 眼唔見唔可以做個平安體檢? 而且有豆b嘅case在先, 我擔心波波, 想及早得個明確答案係無必要😕?
"你話佢有蛋白尿? 用試紙診斷? 咁就話有蛋白尿? 你幫佢連續留5日小便, 要中段, 唔可以太少, 唔可以屙落尿片, 要用容器直接"
當然呢個係正規做法, 無唔啱, 但佢係一隻小狗唔係人啊😓?
我伸手埋去佢仲唔走, 會繼續比我留? 自問無可能做到, 無節衷方法?
之前豆b驗尿從無醫生要求咁高難度嘅做法, 我感覺故意為難!
"你最好去專科醫院, 留院一個禮拜, 咩都一次過做晒"
咁又話佢無病徵? 要去專科醫院, 留院一個禮拜😲?
佢可能見我堅持要驗, 覺得我唔相信佢判斷, 所以唔開心, 就口出此言!
呢種都係一般人口中嘅好醫生, 佢覺得無必要左驗右驗, 同你慳錢!
我唔知係咪豆b嘅case將佢嚇怕? 佢要明哲保身唔想拈手呢D case, 嫌太麻煩?
還是佢無把握去幫波波? 無信心handle唔想做壞招牌?
還是從未遇過咁嘅主人, 幫你慳錢唔領情, 係都要堅持做化驗, 咁多錢就去專科醫院啦!
我完全感受到網上負面嘅指責, 真係大開眼界!
佢提議去專科, 但拒絕比referral, 然後連診金都唔收, 咁我就要收口?
咁當然, 每個人有唔同睇法, 可以認為醫生有權選擇, 人家都無收你診金, 又無呃你錢嘛; 總好過無把握hea住拖症仲累死啦; 但我係失望, 香港要搵一個有heart嘅醫生係咁難😞, 點解唔可以多D瞭解, 有不同意見就變臉, 視為挑戰專業意見?!
"不會因為名利而迷失, 不會因為挫折而退卻, 更不會因為專業而變得冷酷或是漠不關心."
我完全唔可以將呢段文字同L醫生作聯想, 佢係咪請槍㗎 😂
而我, 竟然會為咗呢D文字而感動, 決定去尋訪良醫, 我真係天真病又發作喇!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
