 |
| 隻豬仔去見醫生都好大壓力㗎, 攰晒! |
波波嘅驗尿報告有咗結果, 姑娘早兩日call咗我覆診, 約咗今晚見醫生; 今日週末, 都預咗要等!
去到診所門口都唔想入, 多狗多人, 又怕波波吠其他狗狗乞人憎啦, 同姑娘報到後就出門口, 兩頭行邊行邊等!
我一向守時, 一定早到, 今日等到我預約嘅時間過咗45分鐘, 加上自己早到, 不停抱住波波踱步, 行咗足足一個鐘, 腰酸背痛!
 |
| 姑娘叫下個到我, 入去都完全唔敢開個袋, 怕咗佢! |
終於入到診症室喇, 大家好好媾通, 表達自己嘅睇法!
當然從醫生角度分析波波係有蛋白尿, 尿比重都唔合格, 呢個報告係指向個腎差, 但有幾差? 就要照超聲波睇啦!
好明顯波波唔會好定好乖, 佢咁緊張硬拼一定將佢嚇壞, 萬一嚇到脷仔黑呼吸困難, 又變成好心做壞, 咁即係一定要打鎮靜劑去照先有把握, 呢樣都有一定風險要承擔; 以前H醫生從來唔會幫佢打, 體重太輕藥量拿捏好麻煩, 少少過量都無得掹嘛, 如果要打鎮定劑, 我唔想喇!
綜合驗尿同驗血報告, 醫生話佢個腎未算太壞, 未有見到尿有沉甸物, 波波尿蛋白嘅報告係45mg/dL, UPC比率都未係好差, 仲有空間比我繼續用順勢療法去試吓.
之前我同波波用試紙係睇唔到數據, 凈係見2+, 而試紙嘅1+ - up to 30mg/dL, 2+ - up to 100mg/dL, 其實食咗療劑有無效我係唔知, 因為無數字比較, 可能係有幫到所以今次結果唔太壞!
醫生明白我嘅擔心,亦同意我嘅做法, 繼續用順勢療劑, 定期做UPC追查, 只要keep到無更差, 就可以繼續用順勢療法, 如果不幸控制唔到, 就要用西藥, 再唔得就要照吓!
一步步搵解決方法, 我易接受好多啦, 真係幾攰都無相干, 最重要夾到醫生, 而醫生又明白我嘅憂慮, 都肯配合我嘅做法!
 |
| 個仔見到我放鬆咗, 佢都輕鬆! |
今日係豆b走咗一個月喇, 多謝豆豆你守護細佬, 多謝你送呢份咁好嘅禮物比媽媽, 媽媽祝福你永遠幸福愉快, 從今開始我會將你放入內心深處, 陪住我嘅心跳直到我心跳停止, 帶住愛大家向前進發!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
